8 C
Baku
Tuesday, March 19, 2024
Ev Blog

Avropa Sülh Mexanizminin maliyyə tavanı 17 milyard avrodan çox olacaq

Bugünkü qərardan sonra Avropa Sülh Mexanizminin maliyyə tavanı 2021-2027-ci illər üçün 17 milyard avrodan çox olacaq.

Bu barədə Avropa İttifaqı Şurası məlumat yayıb.

Bildirilib ki, bu gün Şura Avropa Sülh Mexanizminin (EPF) maliyyə tavanını cari qiymətlərlə 5 milyard avro artırmaq qərarına gəlib.

Məsələyə münasibət bildirən Avropa İttifaqının xarici siyasət və təhlükəsizlik məsələləri üzrə ali nümayəndəsi Jozep Borrell qeyd edib ki, Aİ üzərinə götürdüyü öhdəlikləri yerinə yetirir:

“Ukraynaya Yardım Fondu bizim sözlərimizi hərəkətə çevirir. Fondla biz Ukraynanı Rusiyanın müharibəsindən müdafiə etmək üçün nə qədər lazımdırsa, onu dəstəkləməyə davam edəcəyik”.

Məlumatda o da vurğulanıb ki, yeni yaradılmış Ukraynaya Yardım Fondu Aİ-yə həm öldürücü, həm də öldürücü olmayan hərbi texnika və təlimlər vasitəsilə Ukrayna Silahlı Qüvvələrinin inkişaf edən ehtiyaclarını daha da dəstəkləməyə imkan verəcək.

NATO ilə Azərbaycan arasında yeni çərçivə sənədinin razılaşdırılması üzərində iş aparılır

NATO ilə Azərbaycan arasında əməkdaşlıq üçün yeni çərçivə sənədinin razılaşdırılması üzərində iş aparırıq.

Bunu NATO-nun Baş katibi Yens Stoltenberq martın 18-də Azərbaycan Dövlət İnformasiya Agentliyinə – AZƏRTAC-a müsahibəsində deyib.

“Bu çərçivə sənədi qarşılıqlı fəaliyyət məsələlərinə köklənəcək və burada əsas məqsəd Azərbaycan Silahlı Qüvvələrinin NATO standartlarına uyğunlaşdırılması üçün birgə işləməkdir. Biz, həmçinin hərbi təhsil məsələlərinə də önəm veririk. Bu da tərəflər arasında qarşılıqlı fəaliyyəti inkişaf etdirəcək. Biz, eyni zamanda, əməkdaşlığımızı gələcəkdə inkişaf etdirə biləcəyimiz digər sahələri də nəzərdən keçiririk. Bütün bunlar Azərbaycan və NATO qüvvələrini bir-birinə daha da yaxınlaşdıracaq və düşünürəm bu, hər iki tərəf üçün faydalı olacaq”, – o əlavə edib.

Blinken: ABŞ Şimali Koreyanın təxribatlarına qarşı həmişə Cənubi Koreya ilə işləyəcək

ABŞ dövlət katibi Entoni Blinken Şimali Koreyanın təxribatlarına sərt cavab vermək üçün ölkəsinin həmişə Cənubi Koreya ilə işləyəcəyini deyib.

Bu barədə Cənubi Koreya Prezidentinin Ofisinin yaydığı məlumatda qeyd olunub.

Bildirilib ki, Blinken bunu Cənubi Koreya Prezidenti Yoon Suk Yeol ilə görüşü zamanı deyib.

“Dövlət katibi Blinken bildirib ki, Birləşmiş Ştatlar Şimali Koreyanın təxribatlarına qətiyyətlə cavab vermək və Koreya yarımadasında sülh və sabitlik üçün həmişə Cənubi Koreyanın yanında olacaq”, – prezident ofisinin mətbuat xidmətindən bildirilib.

Qeyd olunub ki, ABŞ-ın yüksək səviyyəli diplomatı müttəfiqlər arasında sıx koordinasiya və əlaqəni davam etdirməyə, eyni zamanda, onların “genişləndirilmiş çəkindirmə qabiliyyətini” daha da gücləndirməyə çağırıb.

Marşrut xətləri müsabiqəyə çıxarılır

Azərbaycan Yerüstü Nəqliyyat Agentliyi (AYNA) sərnişindaşıma xidmətinin keyfiyyətinin artırılması ilə bağlı tədbirlər çərçivəsində Bakı-Migəçevir, Bakı-Şamaxı, Bakı-Zaqatala, Bakı-Oğuz, Bakı-Qəbələ, Sumqayıt-Yalama (Xaçmaz), Quba-Qusar şəhərlərarası, paytaxtın 54 nömrəli şəhərdaxili, 123 və 156 nömrəli şəhərətrafı müntəzəm avtobus marşrutlarını müsabiqəyə çıxarır.

Müsabiqə “Avtomobil nəqliyyatı haqqında” Azərbaycan Respublikası Qanununa, Azərbaycan Respublikası Nazirlər Kabinetinin 2009-cu il 3 aprel tarixli 52 nömrəli qərarı ilə təsdiq edilmiş “Avtomobil nəqliyyatı ilə müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə sərnişin daşımalarına daşıyıcıların cəlb olunmasına dair müsabiqənin keçirilməsi Qaydası”na uyğun olaraq təşkil edilir.

Sənədlər 16 aprel saat 17:00-dək Azərbaycan Yerüstü Nəqliyyat Agentliyində (ünvan: Bakı şəhəri, Tarzən Hacı Məmmədov küçəsi 5; əlaqələndirici şəxs: Elsevər Qədimov – tel.: 012-567-99-76, 050-855-53-55, e-poçt: [email protected]) qəbul ediləcək.

Qeyd edək ki, müsabiqəyə əsas avtobuslarla yanaşı, ehtiyat nəqliyyat vasitələri də təqdim olunmalıdır.

İddiaçıların təklifləri komissiya tərəfindən Bakı-Mingəçevit, Bakı-Şamaxı və Bakı-Zaqatala istiqamətlərində 5 Lot üzrə aprelin 30-da;

Bakı-Oğuz, Bakı-Zaqatala, Bakı-Qəbələ və Sumqayıt-Yalama (Xaçmaz) istiqamətlərində 4 Lot üzrə mayın 3-də;

Quba-Qusar istiqamətində, eləcə də paytaxtın 54 nömrəli şəhərdaxili, 123 və 156 nömrəli şəhərətrafı müntəzəm avtobus marşrutları üzrə 4 Lot üzrə mayın 7-də baxılacaq.

Lotlar üzrə marşrutların qrafikləri haqqında məlumatı buradan əldə edə bilərsiniz.

Şəhərlərarası (rayonlararası) və şəhərdaxili (rayondaxili) marşrut xətləri qanunvericiliyin tələblərinə uyğun olaraq mərhələli qaydada müsabiqəyə təqdim edilir. Məqsəd sərnişindaşıma sahəsində göstərilən xidmətin keyfiyyəti, təhlükəsizliyi və rahatlığının artırılmasıdır.

Baş nazirdən dərman vasitələri bağlı QƏRAR

“Dərman vasitələrinin farmakonəzarət Qaydası”nda dəyişiklik edilib.

Banker.az xəbər verir ki, bununla bağlı Baş nazir Əli Əsədov qərar imzalayıb.

Qərara əsasən, Qaydaya bu anlayışlar əlavə edilir:

– dərman vasitəsinin qeydiyyat tarixi – eyni təsiredici maddə və ya eyni təsiredici maddə kombinasiyalı dərman vasitələrində, həmin təsiredici maddə və ya təsiredici maddə kombinasiyalı bir dərman vasitəsinin Avropa İttifaqında () ilk dəfə qeydiyyata alındığı tarix və ya bu tarixi müəyyən etmək mümkün olmadıqda, həmin təsiredici maddə və ya təsiredici maddə kombinasiyalı bir dərman vasitəsinin məlum olan ilk qeydiyyat tarixi;

– dərman vasitəsinin beynəlxalq qeydiyyat tarixi – yuxarıda nəzərdə tutulmuş dərman vasitələri istisna olmaqla hər hansı bir ölkədə dərman vasitəsinin ilk qeydiyyat tarixi;

– məlumat kilid tarixi – dövri olaraq yenilənən təhlükəsizlik hesabatında verilən məlumatların toplanmasının bitdiyi tarix.

Həmçinin, sözügedən qaydaya edilən dəyişikliklə farmakonəzarət üzrə məlumat və hesabat sənədləri (RİP, DYTH, FSƏD) artıq türk dilində də təqdim ediləcək.

Sabah Avroparlamentdə Aİ-nin genişlənməsi müzakirə ediləcək

Sabah Avropa Parlamentinin üzvləri Xarici Əlaqələr Komitəsində Avropa İttifaqına (Aİ) üzv ölkələrin nazirləri, nazir müavinləri və dövlət katibləri ilə Aİ-nin genişlənməsinin gələcəyini müzakirə edəcəklər.

Bu barədə Avropa Parlamenti məlumat yayıb.

Bildirilib ki, Avropa Parlamentinin üzvləri Aİ-nin genişlənməsinin gələcəkdə qarşılaşacağı problemlərə necə yanaşmaq barədə həll yolları axtarmaq istəyirlər.

Qeyd edək ki, fevral ayında Avropa Parlamenti Aİ-nin genişlənməsi məqsədilə institusional və maliyyə islahatlarına çağıran hesabat qəbul edib.

Nazirlik DGK-dan ölkəyə gətirilən radioelekton vasitələr barədə məlumat alacaq

Nazirlər Kabineti 21 avqust 1998-ci il tarixli qərarı ilə təsdiq edilmiş “Telekommunikasiya vasitələri və qurğularının sertifikatlaşdırılması Qaydaları”nda dəyişiklik edib.

Banker.az xəbər verir ki, bununla bağlı Baş nazir Əli Əsədov yeni qərar imzalayıb.

Qərara əsasən, bundan sonra Rəqəmsal İnkişaf və Nəqliyyat Nazirliyi (RİNN) ölkəyə idxal edilən radioelekton vasitələr barədə Dövlət Gömrük Komitəsinin (DGK) informasiya sistemlərindən aşağıdakı məlumatları real vaxt rejimində əldə edə biləcək:

– məhsulun bəyan edilmə tarixi;

– məhsulun xarici iqtisadi fəaliyyətin mal nomenklaturası üzrə kodu;

– məhsul partiyasının qeydiyyat kodu;

– məhsulun təsviri;

– məhsulu idxal edən şəxs barədə məlumat (hüquqi şəxsin adı, fiziki şəxsin soyadı, adı, atasının adı, vergi ödəyicisinin eyniləşdirmə nömrəsi (VÖEN).

Azərbaycanda sərnişindaşımaya dair müsabiqələrdə iştiraka görə ödəniləcək məbləğlər – SİYAHI

Nazirlər Kabineti “Müntəzəm beynəlxalq, şəhərlərarası (rayonlararası) və şəhərdaxili (rayondaxili) sərnişin daşımalarının yerinə yetirilməsi ilə bağlı sifarişçinin keçirdiyi müsabiqələrdə iştiraka görə ödənişin məbləği”ni təsdiq edib.

Banker.az xəbər verir ki, bununla bağlı Baş nazir Əli Əsədov yeni qərar imzalayıb.

Qərara əsasən, bundan sonra Bakı, Gəncə və Sumqayıt şəhərlərinin inzibati ərazi vahidləri üzrə avtomobil nəqliyyatı ilə sərnişin daşımalarına daşıyıcıların cəlb olunmasına dair ödənişin məbləği 500 manat, Bakı, Gəncə və Sumqayıt şəhərlərinin inzibati ərazi vahidləri, Qarabağ və Şərqi Zəngəzur iqtisadi rayonları istisna olmaqla digər şəhər (rayon) inzibati ərazi vahidləri üzrə avtomobil nəqliyyatı ilə sərnişin daşımalarına daşıyıcıların cəlb olunmasına dair ödənişin məbləği 200 manat olacaq, Qarabağ və Şərqi Zəngəzur iqtisadi rayonları üzrə avtomobil nəqliyyatı ilə sərnişin daşımalarına daşıyıcıların cəlb olunmasına dair müsabiqədə iştirak haqqı tələb edilməyəcək.

Bu qurumun işçiləri ilə bağlı Baş nazirdən QƏRAR

Beynəlxalq Münasibətlərin Təhlili Mərkəzinin (BMTM) işçilərinin sayı 32-yə çatdırılıb.

Banker.az xəbər verir ki, Baş nazir Əli Əsədov bununla bağlı müvafiq qərar imzalayıb.

Qərara əsasən, qurumun yeni əməkhaqqıfondu da 53 min 365 manat müəyyənləşdirilib.

Qeyd edək ki, BMTM-in bundan əvvəl işçilərinin sayı 20, əməkhaqqı fondu isə 38 min 547 manat olub.