Türkiyənin “Botaş” dövlət şirkəti “Shell” ilə ildə 4 milyard kubmetr həcmində mayeləşdirilmiş təbii qazın (LNG) alınmasına dair uzunmüddətli müqavilə imzalayıb, Banker.az bu barədə xarici mediaya istinadən xəbər verir.
Tədarük 2027-ci ildə başlayacaq, müqavilənin müddəti göstərilmir.
“Financial Times” Türkiyənin energetika naziri Alparslan Bayraktara istinadən yazır ki, müqavilə müddəti 10 ildir, 2027-ci ildən “Shell” Türkiyə dövlətinə hər il təxminən 2.9 milyon ton (4 milyard kubmetr) LNG tədarük edəcək. Bu, 2023-cü ildə ölkənin ümumi qaz istehlakının təxminən 8%-nə uyğun gəlir.
Müqavilə LNG axınının Türkiyədən kənarda yerləşən Avropa terminallarına yönləndirilməsi imkanını nəzərdə tutur, Bayraktar deyib.
Bu ilin may ayında “Botaş” həmçinin “ExxonMobil Corp.” ilə əməkdaşlıq müqaviləsi imzalayıb və bu müqaviləyə əsasən ildə 2.5 milyon ton LNG almağı planlaşdırılır. İyulun ortalarında Bayraktar yaxın günlərdə müqaviləni açıqlayacağına ümid etdiyini bildirib.
Hesabatda qeyd edilib ki, saziş “Botaş”a LNG tutumunu artırmağa, terminal və boru kəmərlərindən Türkiyənin qaz ehtiyatlarını şaxələndirmək və böyük regional qaz mərkəzinə çevrilmək səylərini dəstəkləmək üçün istifadə etməyə imkan verəcək.
“Botaş” boru kəməri vasitəsilə Rusiya, Azərbaycan və İrandan qaz idxal edir, əsas LNG satıcıları isə ABŞ və Əlcəzairdir.
Türkiyə daxili tələbatı (ildə təxminən 50 milyard kubmetr qaz) qarşılamaq üçün demək olar ki, tamamilə idxaldan asılı olsa da, regional qaz mərkəzinə çevrilməyə çalışır. Ötən il ölkə Rumıniya, Moldova və Macarıstanla bir neçə kiçik həcmli ixrac müqaviləsi imzalayıb.
Bayraktar daha əvvəl demişdi ki, Türkiyə Türkmənistandan qaz idxalı imkanlarını da araşdırır.
