Bu gün və sabah qurumun növbəti iclası keçiriləcək
Bu gün və sabah ABŞ-ın Federal Ehtiyat Sisteminin (FED) növbəti iclası keçiriləcək.
İclasda uçot dərəcəsi nəzərdən keçiriləcək.
Xatırladaq ki, qurumun mayın 1-2-də keçirilmiş iclasında uçot dərəcəsinin 1,5-1,75% səviyyəsində saxlanılmasına qərar verilmişdi. İqtisadçılar bu dəfəki iclasda faizlərin cüzi artırılacağını proqnozlaşdırır.
Məsələn, ABŞ-ın “Morgan Stanley” bank holdinqinin rəhbər iqtisadçısı Ellen Zentner bildirib ki, FED uçot dərəcəsi baxımından demək olar ki, yaxşı nöqtədədir və uçot dərəcəsinə kiçik düzəlik edəcək. Onun fikrincə, ABŞ-da inflyasiyanın səviyyəsi ilə bağlı ciddi narahatlığa ehtiyac yoxdur.
Report-un analitik qrupu da hesab edir ki, iclasda uçot dərəcəsi cüzi, təxminən 0,25% artırılaraq 1,75-2%-ə çatdırıla bilər. Bu, baş versə ABŞ dolları bütün dünyada, o cümlədən qonşu Türkiyədə bahalaşacaq və investorların inkişaf etdəkdə olan ölkələrin bazarından ABŞ bazarına axını bir qədər də güclənəcək.
Bununla belə, FED-un uçot dərəcəsini hələlik, sabit saxlayacağı da istisna deyil. Qurumun ehtiyatlı mövqe nümayiş etdirməsi investorları qeyri-müəyyən risklər fonunda ehtiyatlandıra və qlobal maliyyə bazarlarında Amerika valyutasını ucuzlaşdıra bilər.
