2025-ci ilin yanvar–iyul aylarında Azərbaycanda fəaliyyət göstərən banklar 683 milyon manat xalis mənfəət qazanıblar.
Banker.az xəbər verir ki, bu da Mərkəzi Bankın ötən il təqdim etdiyi 682.8 mln. manatlıq mənfəətə bərabərdir.
Eyni dövrdə banklar 1 milyard 086 milyon manat əməliyyat mənfəəti əldə edib və ümumilikdə 166 milyon manat məbləğində mənfəət vergisi ödənilib.
31 iyul 2025-ci il tarixinə Azərbaycanda fəaliyyət göstərən 22 bankın cəmi aktivləri 55 milyard 700 milyon manat, öhdəlikləri 48 milyard 690 milyon manat, balans kapitalı isə 7 milyard 10 milyon manat təşkil edib. Son bir ayda bank aktivləri 2% azalıb; iyulun əvvəlində aktivlər 56 milyard 734 milyon manat səviyyəsində olub.
Hesabat ayında bankların kredit portfeli 0.1% artaraq 28 milyard 498 milyon manata çatıb. Kredit portfelinin 52.8%-i biznes kreditləri (15 milyard 056 milyon manat), 31.6%-i istehlak kreditləri (9 milyard 002 milyon manat) və 15.6%-i ipoteka kreditləri (4 milyard 440 milyon manat) təşkil edib. Kreditlərin 85.8%-i milli valyutada, 14.2%-i isə xarici valyutada verilib.
Bankların öhdəliklərinin 75.3%-i depozitlərdən ibarətdir ki, bunun 58.8%-i hüquqi şəxslərin (21 milyard 537 milyon manat), 41.2%-i fiziki şəxslərin (15 milyard 114 milyon manat) payına düşür. Fiziki şəxslərin əmanətlərinin 67.2%-i milli valyutada (10 milyard 159 milyon manat), 32.8%-i isə xarici valyutadadır (4 milyard 955 milyon manat). İyul ayında müddətli əmanətlər 1.2% artaraq 111.8 milyon manat, tələbli əmanətlər isə 1% azalaraq 58.7 milyon manat olub.
2025-ci ilin iyulunda bank sektoru üzrə unikal müddətli əmanətçi sayı 5,529 nəfər artaraq illik 15.4% yüksəlib. Hüquqi şəxslərin tələbli depozitləri 16 milyard 141 milyon manat təşkil edib.
31 iyul 2025-ci il tarixinə Azərbaycanda fəaliyyət göstərən 22 bankın filiallarının sayı 498, şöbələrinin sayı 86, ATM-lərin sayı isə 3,357 təşkil edib. Hesabat ayında bank sektorunda çalışanların sayı 0.2% artaraq 26,127 nəfərə çatıb.
