“Tesla” şirkətinin direktorlar şurasının sədri Robin Denholm səhmdarları xəbərdar edib ki, onlar baş direktor İlon Maska dəyəri təxminən 1 trilyon dollar olan kompensasiya paketinin ödənilməsini dəstəkləməlidirlər, əks halda o, şirkəti tərk edə bilər. Bu barədə “CNBC News” şirkətin səhmdarlarına göndərilən məktuba istinadən məlumat yayıb.
“İlonsuz “Tesla” əhəmiyyətli dəyər itirə bilər, çünki şirkətimiz artıq nəyə çevrilmək istədiyimiz baxımından qiymətləndirilməyə bilər”, — deyə Denholm yazıb. Onun sözlərinə görə, İlon Mask şirkətin gələcəyinin açarıdır.
Səhmdarların 5 noyabra qədər təsdiqləməli olduqları ödəniş təklifi müqavimətlə qarşılanıb. “Institutional Shareholder Services” adlı məsləhət firması “astronomik” məbləğ səbəbindən təklifə qarşı səs verməyi tövsiyə edib.
Denholm bildirib ki, məsələ “kompensasiyadan çox, səsverməyə təsir” ilə bağlıdır. Onun sözlərinə görə, İlon Mask süni intellektlə (AI) bağlı “pis şeylərin baş verməməsi üçün” kifayət qədər təsirə malik olmaq istəyir, yəni o, “Optimus” adlı robot ordusuna nəzarət məsələsindəki narahatlıqlarına işarə edir.
Noyabr ayında “Tesla” səhmdarları növbəti 10 il ərzində İlon Maska 1 trilyon dollar ödənilməsi barədə şura təklifinə səs verəcəklər. Müqavilə həmçinin Maskın şirkətdəki payını 13%-dən 25%-ə qədər artıracaq. Lakin bu məbləği almaq üçün Mask müəyyən göstəricilərə çatmalıdır: 20 milyon avtomobilin tədarükü, 1 milyon robotaksinin kommersiya istifadəsinə verilməsi, şirkətin 8,5 trilyon dollar dəyərində qiymətləndirilməsi və 1 milyon insanabənzər “Optimus” robotunun tədarükü.
