2023-cü ilədək Dövlət Neft Fondunun (ARDNF) aktivləri bir barel neftin qiymətinin $60 səviyyəsində qalacağı halda $50,8 mlrd.-a çatacaq. Banker.az bildirir ki, bu barədə Fondun icraçı direktorunun müşaviri Nərgiz Nəsrullayeva-Müdüroğlu bəyan edib.
“ARDNF-nin ortamüddətli və uzunmüddətli gəlirləri üzrə proqnozlarımız bir barel neftin $60 məbləğində orta qiymətinə əsaslanıb. Cari proqnozlarımıza əsasən, 2022-ci ilin sonuna ARDNF-nin aktivləri $50,8 mlrd.-a çatacaq”, – N.Nəsrullayeva-Müdüroğlu «Azeri Observer» jurnalına müsahibəsində bildirib.
Onun sözlərinə görə, 2015-2016-ci illərdə ARDNF-nin aktivlərinin azalması müşahidə edilib, bu da dünya bazarlarında neftin qiymətinin kəskin ucuzlaşması ilə əlaqədar olub.
“Lakin dövlət büdcə xərclərinin uğurlu optimallaşması ilə bərabər neftin qiymətinin artımı 2017-ci ildən etibarən Fondun aktivlərinin sürətli bərpasına imkan yaradıb. Hazırda aktivlər $38,9 mlrd. məbləğində rekord səviyyədədir”, – N.Nəsrullayeva-Müdüroğlu əlavə edib.
ARDNF Azərbaycan prezidentinin 29 dekabr 1999-cu il tarixli fərmanı ilə yaradılıb və dövlət başçısına hesabat verən büdcədənkənar dövlət təsisatıdır. ARDNF-də neft müqavilələrinin reallaşmasından, əsasən dövlətin mənfəət neftinin satışından, ölkə ərazisində neft və qaz nəqlinə görə tranzit tariflərindən, dövlət əmlakının icarəsindən və digər mənbələrdən daxil olan gəlirlər toplanır.
