“Azərbaycan Banklar Assosiasiyası (ABA) nəzdində hərrac mərkəzinin açılması prosesinə start verilib”. Bunu açıqlamasında ABA-nın Hüquq ekspert komissiyasının sədri Qorxmaz Ağayev deyib.
Onun sözlərinə görə, hal-hazırda bununla bağlı təşkilati işlər gedir, bu işlər bitdikdən sonra mərkəz fəaliyyətə başlayacaq: “Burada söhbət banklarda problemli borclarla əlaqədar müştərilərin girov qismində olan əmlaklarının hərrac vasitəsilə satışından gedir. Bura həm məhkəmə mərhələsində olan, yəni prosesin başlanıldığı və məhkəmənin satışla bağlı qərar çıxardığı, həm də artıq satılaraq bankın mülkiyyətində olan əmlaklar aiddir. Bundan başqa, elə hallar olur ki, müştərilər bankla razılığa gələrək borcun qaytarılması müqabilində girovda olan əmlakın satışına icazə verirlər. Bu üç hal üzrə hərrac fəaliyyətə başlayacaq. Azərbaycanda girov predmeti olan əmlakların mərkəzləşdirilmiş, vahid satış bazarı olmadığından müştərilər bu əmlaklar barədə ətraflı məlumat əldə edə bilmirlər. Banklar istəyir ki, bu məlumatı geniş bazara çıxarsın. Belə ki, bazar iştirakçıları bu məlumatlardan şəxsi və digər ehtiyacları üçün istifadə edə bilərlər. Hətta bu məqsədlə elektron informasiya resursunun formalaşdırılması da nəzərdə tutulur”.
Qeyd edək ki, hərrac mərkəzi vasitəsilə bağlanan bankların, ləğv olunmuş sığorta şirkətlərinin də əmlakları satışa çıxarıla bilər.
