Ölkədə aparılan islahatları nəticəsində bir sıra qurumlar ləğv edilərək, yeni, daha çevik strukturlar yaradılıb. Bu istiqamətdə atılan addımlardan biri də Azərbaycan iqtisadiyyatı qarşısında maliyyə sektorunun dayanıqlığını təmin etmək üçün yaradılan Maliyyə Bazarlarına Nəzarət Palatasıdır (MBNP).
Qurum maliyyə bazarlarının fəaliyyətinin səmərəli şəkildə təmin olunması, eləcə də kreditorların, investorların və sığorta olunanların hüquqlarının qorunmasına imkanı verən ilk publik hüquqi şəxs statuslu təşkilatdır.
Milli Məclisin Gənclər və idman komitəsinin sədri Fuad Muradov bu sahə ilə yaxından bağlılığı olmasa da, yeni yaradılan qurumu və rəhbərliyin fəaliyyətini yüksək qiymətləndirdiyini bildirib:
“Maliyyə Bazarlarına Nəzarət Palatasının bu günə qədər atdığı addımların əksəriyyəti müsbət olub. Onun fəaliyyəti bank sisteminin sağlamlaşdırılmasına və bir çox istiqamətlərdə dövlətin maraqlarının qorunub saxlanmasına yönəldilib. Ona görə də ölkə iqtisadiyyatının yüksəldilməsi naminə atılan addımların doğru olduğuna inanıram”.
F.Muradov MBNP-nın sədri Rüfət Aslanlını ictimaiyyətə açıq məmur hesab edir:
“Palatanın rəhbəri hər zaman ictimaiyyətə açıqdır. Bu da çox önəmli faktordur. Elə məsələlər var ki, onları mütləq şəkildə ictimaiyyətlə müzakirə etmək lazımdır. Problemlərə gəldikdə isə bunların əksəriyyəti məhz bankların özündən asılı olan məsələdir. Təəssüf ki, bəzi banklarımız bu sahədən başqa hər işlə məşğul olurlar. İqtisdiyyatda hər hansı dəyişiklik bilavasitə insanlara təsir edir. Cənab prezident də bir neçə dəfə bankların fəaliyyəti ilə bağlı banklara müraciət edib. Lakin təəssüf ki, bəzi banklar bu müraciəti tam dərk edə bilməyiblər. Fikrimcə, bu günə qədər mövcud olan problemlərin əksəriyyəti bankların özündən və bankçılığı tam başa düşməyən insanlardan qaynaqlanır. Və əminəm ki, Palata ölkənin maliyyə bazarlarına nəzarət, apardığı islahatlar nəticəsində daha dayanıqlı sistemin yaradılmasına nail olacaq”.
Milli Məclisin İqtisadi Siyasət Komitəsinin sədri Ziyad Səmədzadə açıqlamasında Maliyyə Bazarlarına Nəzarət Palatasının yaradılma prosesinin səmərəli şəkildə həyata keçirildiyini düşünür:
“Ümumiyyətlə, Azərbaycanda dövlət başçısı İlham Əliyevin bilavasitə təşəbbüsü ilə iqtisadi islahatların dərinləşməsi istiqamətində çox cəsarətli addımlar atılır. Qloballaşan dünya iqtisadiyyatında hər bir ölkə özünün milli iqtisadiyyatını qorumaq üçün konkret addımlar atır. Eyni zamanda, iqtisadi siyasətində müəyyən düzəlişlər edir. Bu da təbiidir, çünki bunsuz inkişafı təmin etmək qeyri-mümkündür. Ona görə də Azərbaycanda iqtisadi islahatların mühüm istiqaməti maliyyə, pul, kredit siyasətinin təşkilidir. Bu siyasəti həyata keçirən strukturlar da Maliyyə Nazirliyi, Vergilər Nazirliyi, İqtisadiyyat Nazirliyi, Dövlət Gömrük Komitəsi, əvvəllər Mərkəzi Bank və digər bu strukturlarla əlaqədə olan nazirliklər və komitələrdir.
Maliyyə Bazarlarına Nəzarət Palatası Azərbaycan iqtisadiyyatı üçün yeni bir qurumdur. Təbii ki, hər bir qurum müəyyən keçid dövrünü yaşayır. Palatanın yaradılma prosesi çox səmərəli şəkildə həyata keçirilib. Milli Məclisin İqtisadi siyasət komitəsinin sədri olaraq deyə bilərəm ki, qısa zaman içərisində dövlət başçısının təşəbbüsü ilə Milli Məclisə təqdim edilmiş çoxsaylı qanun layihələrini müzakirəyə çıxararaq, dəyişiklər etdik. Hazırda Maliyyə Bazarlarına Nəzarət Palatası tam səmərəli fəaliyyət göstərir. Mərkəzi Bankın bir çox funksiyaları Maliyyə Bazarlarına Nəzarət Palatasına verilib. Bu proses indi də davam edir. Bilirsiniz ki, bu gün banklar böyük problemlərlə üzləşirlər. Manatın devalvasiyası, bankların səmərəli göstəricidən aşağı olması, pul gəlirlərinin azalması – bütün bunlar bank sektoruna da ciddi təsir edir. Bu təsiri də yumşaltmaq üçün hökumət müəyyən tədbirlər həyata keçirir. Onlardan biri də Maliyyə Bazarlarına Nəzarət Palatası vasitəsilə banklara nəzarət sistemidir”.
Komitə sədrinin fikrincə, Palatanın formalaşma prosesi bir sıra çətinliklərin öhdəsindən gəlib:
“Bazarın özünün ixtisaslaşması, təmərküzləşməsi, bir çox bankların bağlanması və bununla əlaqədar yaranan problemlərin həlli, kadr siyasətinin aparılması ciddi məsələlərdir. Lakin Maliyyə Bazarlarına Nəzarət Palatası bütün çətinliklərin öhdəsindən gələ bilir. Bir müddətdən sonra Maliyyə Bazarlarına Nəzarət Palatasının banklara dəstəyi daha da artacaq.
Amma problemlərin kökü bankların özündədir. Bankları sağlamalaşdırmaq üçün ilk növbədə banklar özü addım atmalı və əhalinin inamını qazanmalıdır. Müştərilərlə daha kefiyyətli əməkdaşlıq qurmalıdırlar. Dövlət başçısı əmanətlərin sığortalanması ilə əlaqədar fundamental qərarlar qəbul edib. Bunun üçün dövlət büdcəsindən kifayət qədər vəsait ayrılıb. Bütün bu funksiyaların uğurla həyata keçirilməsi Maliyyə Bazarlarına Nəzarət Palatasının fəaliyyəti ilə bilavasitə əlaqəlidir. Hesab edirəm ki, bir müddət keçdikdən sonra Palatanın banklara dəstəyi daha da artacaq. Banklar da özəl sektorun subyekti kimi öz məsuliyyətlərini dərk edəcəklər. Bütövlükdə Azərbaycan çox dinamik inkişaf edən ölkə kimi bundan sonra da bu siyasəti davam etdirəcək. Dövlət başçısının birmənalı məqsədi ondan ibarətdir ki, qlobal risklərə baxmayaraq, kefiyyətli inkişafı təmin etmək üçün bütün strukturlar, o cümlədən bank sektoru da öz fəallığını artırmalıdır. Əminəm ki, Maliyyə Bazarlarına Nəzarət Palatası qarşıya qoyunlan məqsədləri onun səlahiyyətləri çərçivəsində uğurla həll edəcək”.
