Bu ilin aprel-may aylarında “OPEC+” razılaşmasına tam əməl etməyən ölkələr kvotalarını 100% təmin edəcəklərinin və yerinə yetirmədikləri azalma həcmlərinin bir neçə ay ərzində kompensasiya edəcəklərini öhdələrinə götürüblər.
Bu barədə ölkənin Energetika naziri Aleksandr Novak deyib.
Onun sözlərinə görə, razılaşmanın yerinə yetirilməsinin ümumi səviyyəsi olduqca yüksəkdir – 87%: “Qərara alınıb ki, öhdəlikləri yerinə yetirməyən ölkələr 100% öhdəliklərinə çatacaqlarını təsdiqləsinlər və may ayında yer alan əskikləri bir neçə ay ərzində kompensasiya etsinlər”.
Xatırladaq ki, aprel ayının 12-də “OPEC+” ölkələri nazirlərinin 10-cu iclasında qəbul edilmiş tarixi razılaşma ümumilikdə gündəlik xam neft hasilatının may-iyunda 9,7 mln. barel, iyul-dekabrda 7,7 mln. barel, 2021-ci ildən 2022-ci ilin aprel ayının sonuna qədər 5,8 mln. barel azaldılmasını nəzərdə tuturdu.
Bununla yanaşı, OPEC-in üzv və qeyri-üzv ölkələrinin nazirlərinin iyunun 6-da video-konfrans formatında keçirilən 11-ci iclasında gündəlik neft hasilatının 9,7 mln. barel azaldılması ilə bağlı mövcud kvotanın müddətinin daha 1 ay, iyulun sonunadək uzadılması barədə qərar qəbul olunub.
İclasda əldə edilən razılığa əsasən, iyulda gündəlik neft hasilatını OPEC ölkələri 6,084 mln. barel, qeyri-OPEC ölkələri isə 3,616 mln. barel azaldacaq. Səudiyyə Ərəbistanı, BƏƏ, Küveyt və Oman isə gündəlik neft istehsalını iyun ayında əlavə olaraq, təxminən, 1,2 mln. barel həcmində ixtisar edəcəklər. Yeni “Əməkdaşlıq Bəyannaməsi”nə uyğun olaraq Azərbaycan may-iyun ayları üzrə 164 min barrel həcmindəki öhdəliyini bu müddət ərzində də yerinə yetirərək, gündəlik xam neft istehsalını 554 min barel səviyyəsində saxlamalıdır.
