Azərbaycanda qızıl, gümüş və mis hasilatı ilə məşğul olan Böyük Britaniyanın “Anglo Asian Mining Plc.” şirkəti 2020-ci il üçün səhmdarlara 10.3 milyon ABŞ dolları həcmində dividend ödəyib.
Bu barədə şirkətin 2020-ci il üçün açıqladığı maliyyə hesabatında qeyd edilib.
Hesabata əsasən, 2020-ci maliyyə ili ilə əlaqədar olaraq hər adi səhm üçün 0,035 ABŞ dolları yekun məbləğ olaraq illik dividend bu ilin 29 iyul tarixində ödəniləcək. Hər səhmə görə 2020-ci maliyyə ili üçün ümumi ödəniləcək məbləğ 0,095 ABŞ dolları təşkil edir. Bu məbləğdən 0,06 ABŞ dolları artıq ödənilib.
Məlumatda həmçinin qeyd edilir ki, şirkət 2020-ci ilin əvvəlində bütün bank borclarından azad olub.
Xatırladaq ki, “Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. Müqavilədə Azərbaycanın payı 51%, “Anglo Asian Mining Plc.” şirkətinin payı 49% təşkil edir. İlk qızıl hasilatına (“Gədəbəy” yatağında) 2009-cu ildə başlanılıb.
“Gədəbəy” bir-birinə inteqrasiya olunmuş mədənləri olan açıq mədəndir. Şirkət ərazidə yerləşən “Qadir” və “Gədəbəy” yatağından 50 km aralıdakı “Qoşa” yeraltı mədənində, yeni kəşf olunan “Uğur” yatağında da hasilatla məşğuldur.
Report
