Ukraynanın yanacaqdoldurma məntəqələri şəbəkəsinə sahib olan iri şirkətlər dünya birjalarında neftin ucuzlaşması fonunda istehlakçılara təklif olunan yanacağın qiymətini aşağı salıb.
“APA-Economics” Ukraynanın UNİAN agentliyinə istinadən xəbər verir ki, bu barədə “A-95” konsaltinq qrupunun həyata keçirdiyi monitorinqin nəticələrində qeyd olunur.
Məlumata görə, avqustun 21-25-i “Amic”, “Shell”, Azərbaycan Dövlət Neft Şirkəti (SOCAR), WOG, OKKO kimi YDM şəbəkəsinə sahib olan iri şirkətlər yanacağın qiymətlərini təqribən 0,50-0,60 Ukrayna qrivnası aşağı salıb.
“Dizel yanacağının qiymətində müşahidə olunan qiymət enməsi artıq benzinin qiymətinə də təsir edib”, – deyə məlumatda vurğulanır.
Qeyd edək ki, Azərbaycan Mərkəzi Bankının bu günə olan rəsmi məzənnələrinə əsasən, 1 Ukrayna qrivnası 0,0467 manatdır.
