BANKER.AZ — Azərbaycan Prezidenti İlham Əliyev Rövşən Nəcəfin Azərbaycan Respublikası Dövlət Neft Şirkətinin (SOCAR) prezidenti təyin edilməsi haqqında sərəncam imzalayıb, digər sərəncamla onu 1-ci vitse prezident vəzifəsindən azad edib.
“Rövşən Çingiz oğlu Nəcəf Azərbaycan Respublikası Dövlət Neft Şirkətinin prezidenti təyin edilsin”- deyə sərəcamda qeyd edilir. O da qeyd edilir ki, Sərəncam imzalandığı gündən, yəni, 21 iyul 2022-ci il tarixindən qüvvəyə minir.
Digər sərəmcala o, Azərbaycan Respublikası Dövlət Neft Şirkətinin birinci vitse-prezidenti vəzifəsindən azad edilsin.
R.Nəcəf 1982-ci ildə Bakıda anadan olub.
1997-ci ildə Azərbaycan Dövlət İqtisad Universitetinin Beynəlxalq iqtisadi münasibətlər fakültəsinə daxil olub, 2001-ci ildə bakalavr, 2003-cü ildə isə magistratura proqramını fərqlənmə ilə bitirib.
2007-2008-ci illərdə Dövlət Neft Şirkətinin (SOCAR) təqaüd proqramı çərçivəsində ABŞ-ın Kolumbiya Universitetində təhsil alaraq İqtisadi Siyasətin İdarəedilməsi/Beynəlxalq Enerji Menecment və Siyasəti üzrə magistr proqramını uğurla bitirib.
Əmək fəaliyyətinə 2001-ci ildə Azərbaycan Dövlət İqtisad Universitetinin Beynəlxalq iqtisadi münasibətlər və marketinq kafedrasında laborant vəzifəsində başlayıb.
2003-2007-ci illərdə İqtisadi İnkişaf Nazirliyinin İnvestisiyalar və Beynəlxalq İqtisadi Əməkdaşlıq departamentinin İnvestisiya Siyasəti şöbəsində məsləhətçi və baş məsləhətçi vəzifəsində çalışıb.
2008-2009-cu illərdə SOCAR-ın Sərmayələr İdarəsinin Sərmayələr üzrə Kontraktlar şöbəsinin rəisi vəzifəsində işləyib.
2009-2010-cu illərdə İqtisadi İnkişaf Nazirliyində Xarici İqtisadi Əlaqələr şöbəsinin müdiri və İqtisadi İnkişaf Nazirinin köməkçisi olub.
2010-2018-ci illərdə “Azərbaycan İnvestisiya Şirkəti” ASC-nin icraçı direktorunun müavini və icraçı direktoru vəzifələrində çalışıb.
Ölkə prezidentinin 2018-ci il 11 may tarixli Sərəncamı ilə Azərbaycan Respublikası Prezidentinin Administrasiyasının İnnovativ inkişaf və elektron hökumət məsələləri şöbəsinin müdiri təyin edilib.
Ölkə prezidentinin 2019-cu il 28 avqust tarixli Sərəncamı ilə Maliyyə Monitorinqi Xidmətinin İdarə Heyətinin sədri, 2020-ci il 11 fevral tarixli Sərəncamı ilə İqtisadiyyat nazirinin müavini təyin edilib. İqtisadiyyat üzrə fəlsəfə doktorudur.
Azərbaycan Respublikası Prezidenti İlham Əliyevin sərəncamı ilə Rövşən Nəcəf iqtisadiyyat nazirinin I müavini vəzifəsinə təyin olunub.
10 fevral 2022-ci il tarixdə Prezidenti İlham Əliyevin sərəncamı ilə Rövşən Nəcəf SOCAR-ın birinci vitse-prezidenti və prezidentin vəzifəsini müvəqqəti icraedicisi təyin edilmişdi.
3-cü dərəcəli dövlət müşaviridir.
Evlidir, 2 övladı var.
