Səudiyyə Ərəbistanının vəliəhd şahzadəsi Məhəmməd bin Salman dünyanın ən böyük neft şirkəti “Saudi Aramco”nun 78 milyard dollar dəyərində 4%-lik payını ölkənin suveren sərvət fonduna köçürüb, bu barədə “The Wall Street Journal” yazıb.
Banker.az bu barədə RBC-ya istinadən xəbər verir.
Razılaşma nəticəsində dünyanın ən böyük neft ixracatçısı olan Səudiyyə Ərəbistanı hökumətinin payı 90.18%-ə enib. “Saudi Aramco” bildirib ki, bu razılaşma şirkətin əməliyyatlarına, strategiyasına və ya Səudiyyə hökuməti üçün əsas maliyyə mənbəyi olan dividend bölgüsünə heç bir təsir göstərməyəcək.
Bu, Məhəmməd bin Salmanın “Saudi Aramco”nun səhmlərini ölkənin suveren fonduna köçürdüyü ilk hal deyil. Keçən ilin fevralında o, həmçinin fonda neft şirkətinin 4%-ni köçürüb, o vaxt bu məbləğ təxminən 80 milyard dollar təşkil edib. Sövdələşmə fondun 2025-ci ilə qədər idarə etdiyi aktivləri 1 trilyon dollardan çox artırmaq planının bir hissəsi olub.
Səudiyyə Ərəbistanının suveren fondu 1971-ci il avqustun 17-də Kral Feysəl bin Əbdüləziz Əl Səud tərəfindən yaradılıb və həmişə hakim sülalənin əlində olub. Fondun məqsədi neft ixracı ilə əlaqəli olmayan şirkətlərə və sənaye sahələrinə maliyyə yardımı üçün ölkə iqtisadiyyatını diversifikasiya etməkdir. İndi fondun sədri Məhəmməd bin Salmandır, onun ümumi aktivləri 620 milyard dollara çatır.
