Noyabrın 5-6-da Belarus paytaxtında MDB üzvü olan ölkələrin “Minsk işgüzar görüşləri” adlı beynəlxalq maliyyə-bank forumu keçiriləcək.
Birliyin Minskdəki qərargahının mətbuat xidmətindən AZƏRTAC-a verilən məlumata görə, Belarus Nazirlər Sovetinin, Birliyin İcraiyyə Komitəsinin, VTB bankının və Belarus Banklar Assosiasiyasının dəstəyi ilə təşkil edilən bu tədbir MDB Maliyyə-Bank Şurası və “ASB – Belarusbank” ASC tərəfindən keçirilir.
Forumun işində MDB ölkələrinin hökumət orqanlarının, bank və biznes-strukturların, habelə Avropa və Asiyadan olan beynəlxalq inkişaf təşkilatlarının nümayəndələrinin iştirakı nəzərdə tutulur.
MDB İcraiyyə Komitəsinin sədri – icrası katib Sergey Lebedev forumda iştirak edəcək.
Tədbirin işgüzar proqramında MDB ölkələrinin maliyyə bazarlarının inkişafı, maliyyə-bank sahəsində böhranın aradan qaldırılması yollarının axtarışı, ixracın dəstəklənməsinə və Birlik ölkələrinin iqtisadiyyatına investisiyalar cəlb edilməsi ilə bağlı aktual məsələlərin müzakirəsi nəzərdə tutulur.
