İstifadəçilərin məxfiliyini artırmaq məqsədilə “WhatsApp” messenceri profili yad gözlərdən qorumaq üçün yeni imkan hazırlayıb – artıq siz etibarlı insanlar dairəsinə daxil olmayanlar üçün alternativ profil yarada bilərsiniz.
Parametrlərə uyğun olaraq alternativ profilə fərqli şəkil və ad təyin etmək mümkündür. Belə ki, əgər istifadəçi əsas profil şəklinin yalnız kontaktlar siyahısındakı şəxslər üçün əlçatan olmasını təyin edibsə, o zaman başqalarına alternativ şəkil göstəriləcək.
Yeni funksiya istifadəçilərə əlavə məxfilik təmin edən “çağırılmamış qonaqlara” qarşı kifayət qədər effektiv qoruyucu tədbir olacaq. Yenilik hazırda inkişaf mərhələsindədir və ehtimal ki, tətbiqin gələcək buraxılışında, o cümlədən Apple iOS üçün versiyada ictimaiyyətə təqdim olunacaq.
