Beynəlxalq Valyuta Fondu (BVF) hesab edir ki, Qırmızı dənizdə gəmilərin atəşə tutulması ilə bağlı vəziyyət hələ ki qlobal iqtisadiyyata təsir göstərməyib, Banker.az bu barədə Kommersant.ru-ya istinadən xəbər verir. Bu barədə BVF-nin idarəedici direktoru Kristalina Georgiyeva “The Washington Post”a müsahibəsində bildirib. O etiraf edib ki, Süveyş kanalı ilə daşıma azalıb, Panama kanalında da problemlər yaranıb.
Xanım Georgiyevanın sözlərinə görə, Qırmızı dənizdəki vəziyyətin nəticələri “qlobal iqtisadi artım proqnozlarını əhəmiyyətli dərəcədə pozacaq” miqyasda deyil. Onun fikrincə, ən böyük təsir qazancının böyük hissəsi Süveyş kanalından gələn və hazırda ayda 100 milyon dollardan çox itirən Misirdə hiss olunur.
Onun sözlərinə görə, Süveyş kanalı ilə daşınan yüklərin həcmi xeyli azalıb, dəniz yolu ilə yüklərin daşınması və sığorta xərcləri isə artıb. BVF-nin məlumatına görə, yanvar ayında Süveyş kanalı ilə nəqliyyat keçən illə müqayisədə təxminən yarıya qədər azalıb.
Qırmızı dənizdə beynəlxalq gəmilərin atəşə tutulması halları 2023-cü ilin dekabrında artıb. Bu, İsrail ilə husilərin dəstəklədiyi Fələstinin Həmas hərəkatı arasında gedən müharibə fonunda baş verib. Yanvarın 12-dən bəri ABŞ bir sıra Qərb ölkələrinin dəstəyi ilə Yəməndə husilərin mövqelərinə bir neçə zərbə endirib.
