Azərbaycanda fəaliyyətdə olan bankların cəmi aktivləri 29 fevral 2024-cü il tarixinə 48 mlrd. 735.7 mln. manat, cəmi öhdəlikləri 42 mlrd. 548.4 mln. manat, balans kapitalı 6 mlrd. 187.3 mln. manat olub.
Banker.az bunu Azərbaycan Mərkəzi Bankına istinadən xəbər verir.
Yanvarda bankların aktivləri 49 mlrd. 296.8 mln. manat, cəmi öhdəlikləri 43 mlrd. 144.4 mln. manat, balans kapitalı 6 mlrd. 152.4 mln. manat idi.
Fevral ayında bankların kredit portfeli 1.1% və ya 266.7 mln. manat artaraq 23 mlrd. 833 mln. manat olmuşdur. Kredit portfelinin strukturu: ı) biznes kreditləri – 54.8% (13 mlrd. 063.7 mln. manat); ıı) istehlak kreditləri – 29.7% (7 mlrd. 077.3 mln. manat) və ııı) ipoteka kreditləri – 15.5% (3 mlrd. 692 mln. manat). Ay ərzində biznes, istehlak və ipoteka kreditləri müvafiq olaraq 150.8 mln. manat (+1.2%), 69.3 mln. manat (+1%) və 46.5 mln. manat (+1.3%) artıb.
Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı əvvəlki ilin müvafiq dövrünə nəzərən 1.1 faiz bəndi azalaraq 1.9% təşkil etmişdir.
Öhdəliklərin strukturunda depozit portfeli üstünlük təşkil edir – cəmi öhdəliklərin 82.2%-i və ya 34,959.3 mln. manat. Depozit portfelinin 62.8%-i (21 mlrd. 955.7 mln. manat) hüquqi şəxslərin, 37.2%-i (13 mlrd. 003.6 mln. manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir.
2024-cü ilin fevral ayında fiziki şəxslərin əmanətləri 1.3% və ya 172.4 mln manat artaraq 13 mlrd. 003.6 mln. manat təşkil etmişdir. Fiziki şəxslərin əmanət portfelinin 55.2%-i (7 mlrd. 174.2 mln. manat) müddətli əmanətlərdən ibarətdir. Hüquqi şəxslərin tələbli depozitləri 17 mlrd. 037.3 mln. manat olmaqla, hüquqi şəxslərin cəmi depozit portfelinin 77.6%-ni təşkil etmişdir.
Fiziki şəxslərin əmanətlərinin dollarlaşması fevral ayında əvvəlki ilin müvafiq dövrünə nəzərən isə 3.3 faiz bəndi azalaraq 35.3% təşkil etmişdir.
2024-cü ilin yanvar – fevral aylarında banklar 209.8 mln. manat xalis mənfəət, 298.3 mln. manat məbləğində əməliyyat mənfəəti əldə etmişlər. Cari ilin 2 ayında banklar tərəfindən ümumilikdə 48.1 mln. manat məbləğində mənfəət vergisi ödənilmişdir.
