“Financial Times” yazır ki, 2024-cü ildə qlobal iqtisadi artım ötən illə müqayisədə bir qədər yüksək ola bilər, çünki ABŞ və Hindistan kimi ölkələrdə son aylarda artım sürətlənib.
Güvən, maliyyə bazarları və real iqtisadi fəallığı nəzərə alan ABŞ iqtisadiyyatının göstəricisi 2022-ci ilin ortalarından bəri ən yüksək səviyyəyə qalxıb. Hər altı aydan bir yenilənən “Brookings-FT Tiger” qlobal iqtisadi indeksinə əsasən, kifayət qədər zəif qlobal iqtisadi şərtlər fonunda “işıq şüası” olan Hindistanda da oxşar vəziyyət müşahidə olunur.
Brukinq İnstitutunun baş əməkdaşı Esvar Prasad hesab edir ki, “Tiger” indeksi bu il qlobal iqtisadi artımda 2023-cü illə müqayisədə cüzi sürətlənməni vəd edir. Bununla belə, o əlavə edib ki, “qlobal iqtisadiyyatın bərpasına geosiyasi münaqişələr, proteksionist siyasət və davamlı inflyasiya mane olur”.
“Brookings-FT” indeksi iqtisadi fəaliyyətin, maliyyə bazarlarının və inamın real və tarixi göstəricilərini müqayisə edir.
Beynəlxalq Valyuta Fondu (BVF) yanvar ayında qlobal ÜDM artımının bu il 3.1% səviyyəsində qalacağını və 2025-ci ildə yalnız bir qədər artaraq 3.2%-ə yüksələcəyini proqnozlaşdırır. Bu həftə BVF qlobal bərpa proqnozu ilə bağlı son qiymətləndirməsini açıqlayacaq.
