“Moody’s” agentliyi “Intel”in kredit reytinqini “A3″dən “BAA1″ə endirib, Banker.az bu barədə xarici mediaya istinadən xəbər verir.
Agentlik analitikləri yaxın 12 və ya 18 ay ərzində şirkətin gəlirliliyinin pisləşəcəyini gözləyirlər. Əgər əvvəlki 12 ayda “Intel”in borc yükünün vergilər də daxil olmaqla faiz və amortizasiya ödənişlərinə nisbəti 4.35-i keçməyibsə, növbəti il yarımda bu, 7-yə çata bilər.
Ekspertlər qeyd edirlər ki, 2025-ci ilin sonuna qədər şirkətin gəlirliliyinə yeni texnologiyaların inkişafı və müəssisələrin tikintisi üçün artan xərclər mənfi təsir göstərəcək. Bundan əlavə, şirkət mövcud bazar vəziyyətinə görə çox da uğurlu olmayan məhsul xətti strukturuna malikdir və onun məhsullarına tələbat demək olar ki, bütün seqmentlərdə gözləniləndən aşağıdır.
Bundan əvvəl bir qrup səhmdar şirkətin maliyyə vəziyyəti ilə bağlı məlumatları gizlətdiyinə görə “Intel” rəhbərliyini məhkəməyə vermişdi.
İkinci rübün sonunda “Intel”in gəliri 1% azalaraq 12.83 milyard dollara düşüb, bununla yanaşı şirkət 1.61 milyard dollar xalis zərər edib.
