Çin Ordusu yeni nəsil aviasiya qırıcının sınaqlarına başlayıb, lakin təyyarənin əks olunduğu kadrlar göstərilməyib.
Bu barədə “South China Morning Post” qəzeti məlumat yayıb.
Çin J-31 və ya J-35 adlanacaq aviasiya qırıcısı üzərində işləyir. Onun 2012-ci ildə ilk uçuşunu həyata keçirən iki mühərrikli beşinci nəsil ağır FC-35 qırıcısının modifikasiyasından biri olduğu güman edilir.
Aprel ayında ÇXR Müdafiə Nazirliyi sosial şəbəkələrdə “Lyaonin” təyyarədaşıyan gəmisinin göyərtəsində ən yeni qırıcı təyyarəni əks etdirən fotoşəkillər paylaşıb. Çin ordusunun əsas aviasiya qırıcısı J-15 sayılır ki, o da öz növbəsində Ukraynadan alınan Su-33 təyyarəsinin prototipi əsasında hazırlanıb.
Hazırda ÇXR Hərbi Dəniz Qüvvələrinin iki təyyarədaşıyan gəmisi var. Onlardan biri – “Lyaonin” sovet istehsalı olan “Varyaq” kreyserinin bazasında, digəri – “Şandun” isə “Lyaonin” bazasında layihələndirilib.
Çinin üçüncü təyyarədaşıyan gəmisi – “Futsızyan” 2022-ci ilin iyununda suya buraxılsa da, onun Hərbi Dəniz Qüvvələrinə təhvil veriləcəyi 2025-ci ildə gözlənilir.
“South China Morning Post” qəzetinin məlumatına görə, Çin eyni zamanda nüvə enerjisi ilə çalışacaq dördüncü təyyarədaşıyan gəmisini də inşa edir.
