Uorren Baffetin maliyyə holdinqi “Berkshire Hathaway”, “Bank of America”dakı (BofA) investisiyalarını azaltmağa davam edir. 19 sentyabrda dərc olunmuş hesabata görə, “Berkshire Hathaway” həmin həftə ərzində bankın 863 milyon dollar dəyərində səhmlərini satıb.
Banker.az xəbər verir ki, bu məlumat Bloomberg agentliyi tərəfindən ABŞ Qiymətli Kağızlar və Birja Komissiyasına (SEC) təqdim edilmiş hesabatlara əsaslanaraq yayımlanıb.
Satışlar 20, 23 və 24 sentyabrda baş verib və nəticədə şirkətin BofA-dakı payı 10.5%-ə enib. “Berkshire Hathaway”, 2019-cu ildən bəri azaltmadığı “Bank of America” səhmlərini bu ilin iyul ayının ortalarından etibarən satmağa başlayıb. Avqust ayında şirkət fasilə versə də, sentyabr ayında yenidən satışlara davam edib.
Baffet uzun illər BofA-dakı payını artırıb və bank rəhbərliyini tərifləyib, lakin investisiyalarını azaltmaq qərarına dair ictimai açıqlama verməyib. Bloomberg-in əvvəlki məlumatlarına görə, bu, amerikalı requlyatorların böyük bank səhmdarlarının maliyyə institutlarına təsir etməməsini istəməsi ilə bağlı ola bilər.
Gözlənilir ki, “Berkshire Hathaway”-in bankdakı payı tezliklə 10%-dən aşağı düşə bilər — bu isə səhmdarın əməliyyatlara dair məlumatı bir neçə gün ərzində açıqlama öhdəliyi olan həddi təşkil edir. 10%-dən aşağı düşdükdən sonra “Berkshire Hathaway” əməliyyat məlumatlarını yalnız rüblük hesabatlarda açıqlaya biləcək.
Sentyabr ayında Uorren Baffet faktiki olaraq “Bank of America”ya etdiyi investisiyaları geri qaytardı. İyul ayının ortalarından etibarən satılan səhmlərdən əldə edilən gəlir və 2011-ci ildən alınan dividendlər 14.6 milyard dolları keçdi — bu isə BofA-da öz payını yaratmaq üçün konqlomeratın əvvəl xərclədiyi məbləğdir.
28 avqustda keçirilən ticarətdə “Berkshire Hathaway”in bazar dəyəri 1 trilyon dolları keçdi və nəticədə ABŞ-ın bu göstəriciyə çatan yeddinci şirkəti oldu. “Berkshire Hathaway”, həmçinin texnologiya sektorundan kənarda kapitalizasiyası 1 trilyon dolları keçən ilk ABŞ şirkətidir.
