Dünyanın ən böyük zeytun yağı istehsalçısı olan İspaniyanın “Deoleo” şirkəti hesab edir ki, bu bazar üçün ən çətin vaxtlar artıq geridə qalıb və yaxın aylarda qiymətlər iki dəfə enə bilər. “Deoleo”nun satış direktoru Miqel Anhel Qusman bildirir ki, yaxın aylarda bir litr zeytun yağının orta qiyməti indiki 9-10 avrodan 5 avroya düşəcək.
Zeytun əkinləri quraqlıqdan və məhsul çatışmazlığından əziyyət çəkdiyindən (xüsusən də qlobal zeytun yağı istehsalının təxminən 40%-ni təşkil edən İspaniyada) son beş ildə zeytun yağının qiymətləri təxminən üç dəfə artıb.
Bununla belə, indi vəziyyət dəyişir: bazar iştirakçıları 2024-2025-ci illərdə İspaniya, Yunanıstan və Tunisdə yaxşı zeytun məhsulu olacağını proqnozlaşdırırlar. Qusman qeyd edir ki, qarşıdakı aylar üçün proqnoz nikbindir, çünki tədarükün artması ilə bazarın normal vəziyyətə qayıtması gözlənilir.
