“Shell plc” və “Exxon Mobil” korporasiyalarından Böyük Britaniyada qaz aktivləri almağı hədəfləyən enerji treyderi İranın neft-kimya şirkətindən vəsait yönəltməkdə ittiham olunaraq məhkəməyə verilib.
Banker.az xəbər verir ki, Fransesko Mazzagatti Londonda açılmış məhkəmə işində, İranda plastik qatran istehsalçısı olan “Mehr Petrochemical Co.”nun dolayı mülkiyyətindən qazanc əldə etməkdə ittiham olunur. ABŞ Maliyyə Nazirliyi keçən il Mehrin İran rejimi adından fəaliyyət göstərən şirkətlərə kömək edən geniş bir “kölgə bankçılıq şəbəkəsi”nin mərkəzində olduğunu bəyan edib.
Londonda açılmış məhkəmə iddiası Sinqapurda yerləşən və “Mehr”də nəzarət payına sahib olan “Alliance Petrochemical Investment” (API) tərəfindən avqust ayında irəli sürülüb. API Mazzagattini “Mehr” məhsullarını paylamaqda və ABŞ sanksiyalarından sonra belə şirkətdəki payını gizli şəkildə saxlamaqda ittiham edir.
Mazzagatti bu iddiaları rədd edir, Bloomberg-ə “Mehr” üzərində heç vaxt nəzarətinin olmadığını bildirir və iddiaları keçmiş iş ortağı Arşiya Cahanpur tərəfindən başladılmış “əsassız bir kampaniya” adlandırıb.
“Fransesko Mazzagatti “Mehr” ilə hər hansı bir iş münasibətinə görə istintaq və ya yoxlamaya məruz qalmır,” – deyə onun nümayəndəsi elektron məktubda bildirib. “Financial Times” bu məhkəmə işi haqqında detalları daha əvvəl xəbər vermişdi.
Mazzagattinin “Viaro Energy Ltd.” şirkəti Şotlandiya sahillərində yerləşən və Böyük Britaniyanın ümumi qaz istehsalının 5%-nə nəzarət təmin edən bir sıra razılaşmalar üçün “Shell” və “Exxon” ilə tənzimləyici təsdiq gözləyir. Şirkət bu razılaşmanı iyul ayında elan edərkən, onun Böyük Britaniyanın enerji istehsalının “onurğa sütununa” çevriləcəyini bildirib. Bu razılaşmalara daxil olan 11 dəniz obyektinin alınması Böyük Britaniyanın Şimal Dənizi Keçid İdarəsinin (NSTA) təsdiqinə tabedir. NSTA, bu prosesdə lisenziya sahibinin “uyğunluğu”nu da nəzərə ala bilər. Mazzagatti bildirir ki, o, tənzimləyici ilə “mütəmadi ünsiyyətdə”dir.
Londondakı məhkəmə iddiasında Mazzagattinin API-ni faktiki idarə etdiyi iddia olunur. Bildirilir ki, o, 2020-ci ilin sentyabrında idarə heyətindən istefa verdikdən sonra belə şirkəti yönləndirməyə davam edib. İddiada deyilir ki, Mazzagatti “Mehr” ilə hələ də API-nin baş direktoru olaraq fəaliyyət göstərirmiş kimi işləyib.
