Amerika İT nəhəngləri bu il süni intellektin inkişafına investisiyalar üzrə yeni rekord vurmağa hazırlaşır. Bu barədə şirkətlərin öz hesabatlarında təqdim etdikləri məlumatları nəzərdən keçirən “Financial Times” (FT) yazıb. 2024-cü ildə “Microsoft”, “Alphabet”, “Amazon” və “Meta” süni intellektə 246 milyard dollar sərmayə qoyub ki, bu da bütün illər ərzində rekord göstərici olub. Analitiklər vurğulayırlar ki, bu il investisiyalar 320 milyard dolları keçə bilər.
“Amazon” əvvəlki illərdə olduğu kimi bu il də süni intellektə ən çox pul xərcləyəcək: 100 milyard dollar (2024-cü ildə – 77.8 milyard dollar). “Microsoft” öz növbəsində bu sektora 80 milyard dollar (2024-cü ildə 75.6 milyard dollar) sərmayə qoymağı planlaşdırır, “Alphabet” isə investisiyalarını 75 milyard dollara çatdıracaq.
“FT”nin qeyd etdiyi kimi, gəlirlərdə mütənasib artım olmadan xərclərin kəskin artması texnoloji şirkətlərin səhmdarlarını narahat edir, çünki bu, əks halda dividendlərin ödənilməsi və səhmlərin geri alınması üçün istifadə olunacaq kapitalın azalmasına gətirib çıxarır, həmçinin AI ilə əlaqəli olmayan fəaliyyət sahələrinin inkişafına mənfi təsir göstərir.
