ABŞ səhmləri iqtisadi qeyri-müəyyənliklər və yalnız bir neçə böyük şirkətin qazanc əldə etməsi kimi risklərlə qarşılaşdığı bir vaxtda, nüfuzlu “Barclays Plc”dən Aleksandr Altman investorlara digər səhmlərə yönəlməyi tövsiyə edir.
Banker.az xəbər verir ki, “Barclays”ın qlobal səhmlər üzrə taktiki strategiya rəhbəri olan Altman, ABŞ bazarlarının yüksək dəyərləndirildiyini nəzərə alaraq, ABŞ bazarlarında satış strategiyasını tətbiq etməyi tövsiyə edir. Bununla belə, o “Bloomberg”ə deyir ki, bu, struktur baxımından ABŞ bazarlarına bədbin yanaşma deyil, sadəcə qısamüddətli taktiki addımdır:
“Mən ABŞ bazarlarına fundamental olaraq bədbin baxdığımı demirəm, amma yaxın perspektivdə bu hekayədə artıq yer qalmayıb.”
Altman son iki ay ərzində Avropa səhmlərinə optimist yanaşaraq düzgün proqnoz vermişdi. Avropa şirkətlərinin güclü mənfəət göstəriciləri fonunda, hətta ABŞ ilə ticarət müharibəsi riskləri artsa da, Avropanın “Stoxx 600” indeksi rekord həddə yüksəlib.
ABŞ-ın “Magnificent Seven” (Möhtəşəm Yeddilik) texnologiya səhmləri 2025-ci ilin əvvəlində dayanıqlı qalsa da, ABŞ-ın süni intellekt sahəsindəki liderliyinə dair skeptisizm artır. “Bank of America” (BofA)-nın keçən ay apardığı sorğuya əsasən, investorların Avropa səhmlərinə ayırdığı vəsait -22%-dən +1%-ə yüksəlib. Bu, son 25 ildə Avropaya olan marağın ikinci ən böyük artımıdır.
BofA strateqləri də Altmanın fikirlərini dəstəkləyir. Onlar bildirir ki, ABŞ texnologiya nəhənglərinin təsiri azalır və 2025-ci ilin əvvəlində bir çox qlobal bazarlar S&P 500 indeksindən daha yüksək gəlir gətirib.
Altman investorların yalnız ABŞ texnologiya səhmlərinə və süni intellekt ticarətinə fokuslanmamalı olduqlarını vurğulayır. O, həmçinin hedc-fondların ABŞ səhmlərindəki yüksək uzun mövqelərinin (long positions) bu bazarı riskli vəziyyətə saldığını qeyd edir:
“Son iki ildə çox yaxşı nəticə verən strategiyalar, yəqin ki, bu il daha az effektiv olacaq.”
Bununla belə, Almaniyada qarşıdan gələn seçkilər Avropa səhmlərində dalğalanmalara səbəb ola bilər, lakin Altman bunu yeni alış fürsəti kimi qiymətləndirir.
ABŞ bazarına gəldikdə, Altman istehsalat sektorunun 2022-ci ildən bəri ilk dəfə genişlənməsinin bəzi sahələrdə fürsətlər yaratdığını qeyd edir. O, materiallar, sənaye və enerji sektorlarını diqqət mərkəzində saxlamağı tövsiyə edir.
