Neft istehsalçılarının təşkilatı OPEC-in qəbul etdiyi qərarlar qlobal bazarlara uzunmüddətli baxışı nəzərə alır və qiymət sabitliyini təmin etməyə yönəlib.
Banker.az xəbər verir ki, bu barədə təşkilatın baş katibi Heysəm Əl-Qeys çərşənbə axşamı Hindistan Enerji Həftəsi konfransında bildirib.
Bu şərhlər ABŞ prezidenti Donald Trampın neft hasilatçılarından qiymətlərin aşağı düşməsinə kömək etmək üçün istehsalı artırmağı tələb etməsindən sonra verilib.
Neft İxrac Edən Ölkələr Təşkilatı (OPEC) və onun müttəfiqləri – OPEC+ kimi tanınan qrup bu ayın əvvəlində aprel ayından etibarən neft hasilatını tədricən artırmaq siyasətinə sadiq qalacağını açıqlamışdı.
“Biz bazarı izləyirik. Təchizat və tələbi təhlil edirik. Qərarlarımız siyasi amillərdən uzaq, sırf texniki və sağlam iqtisadi əsaslara söykənir və bazarda sabitlik yaratmağı hədəfləyir”, – Əl-Qeys bildirib.
OPEC+ qlobal tələbatla bağlı narahatlıqlar və təşkilat xaricində hasilatın artması səbəbindən hasilatın azaldılması tədbirlərini mart ayının sonuna qədər qüvvədə saxlayır.
“Əgər ötən ilə baxsanız, neft ehtimal ki, ən az dəyişkənliyə məruz qalan xammal olub. Düşünürəm ki, bu, OPEC+ tərəfindən qəbul edilən qərarlara və göstərilən aydınlığa bağlıdır. Bizim məqsədimiz budur və biz bu yolla davam edəcəyik”, – o əlavə edib.
Yanvar ayında yenidən prezident vəzifəsinə qayıtdıqdan sonra Tramp yüksək neft qiymətlərinin Rusiyanın Ukraynada müharibəni davam etdirməsinə kömək etdiyini iddia edib.
OPEC+ və Tramp 2016-2020-ci illərdə, onun ilk prezidentliyi dövründə, dəfələrlə münaqişəyə girib. O vaxt ABŞ prezidenti təşkilatdan İrana tətbiq edilən sanksiyalar səbəbindən azalan neft tədarükünü kompensasiya etmək üçün hasilatı artırmağı tələb edirdi.
