Rəqabət Məcəlləsinin tələbləri tətbiq edilməyən və ya məhdud tətbiq edilə bilən hallar, fəaliyyət sahələri və məhsullar təsdiqlənib.
Nazirlər Kabineti bu barədə qərar verib.
Qərara əsasən, aşağıdakı hallarda Məcəllənin tələbləri bu sənəddə nəzərdə tutulan fəaliyyət sahələrinə və məhsullara tətbiq edilmir və ya məhdud tətbiq edilir:
-Azərbaycan Respublikasının bütün ərazisində və ya ayrı-ayrı yerlərində (bu halda hərbi vəziyyət elan edildiyi ərazinin (ərazilərin) hüdudlarında) hərbi vəziyyət elan edildikdə;
-Azərbaycan Respublikasının ayrı-ayrı yerlərində fövqəladə vəziyyət elan edildikdə (elan edildiyi ərazidə).
Yuxarıda nəzərdə tutulan hallarda Məcəllənin tələbləri aşağıdakı fəaliyyət sahələrinə və məhsullara tətbiq edilmir:
– hüquqi şəxs yaratmadan kənd təsərrüfatı məhsullarının istehsalı və satışı ilə məşğul olan fiziki şəxslərin, habelə ailə kəndli təsərrüfatlarının istehsal və digər təsərrüfat fəaliyyəti (məhsulların emalı, saxlanması, daşınması və satılması);
-həmkarlar ittifaqları təşkilatlarının fəaliyyəti;
-sənətkarlığın misgərlik, qalayçılıq və saxsı məmulatlarının, təsərrüfat müxəlləfatının, bağçılıq-bostançılıq alətlərinin, xalq musiqi alətlərinin, oyuncaqların, suvenirlərin, qamışdan və qarğıdan məişət əşyalarının düzəldilməsi, keramika məmulatlarının bədii işlənməsi, bədii tikmə, ağac materiallardan məişət alətlərinin hazırlanması (sənaye üsulu ilə istehsal istisna olmaqla);
– bütün növ nəqliyyat vasitələri ilə sərnişin və yük daşımalarının həyata keçirilməsi;
– “Mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların siyahısı haqqında” qanun ilə müəyyən edilmiş əşyalar.
Sənəddə nəzərdə tutulan hallarda aşağıdakı fəaliyyət sahələrinə və məhsullara yalnız Məcəllənin tələblərinə tətbiq edilir:
– elektrik enerjisi istehsalında bərpa olunan enerji mənbələrindən istifadə, “yaşıl” texnologiyaların tətbiqi sahələri;
– Nazirlər Kabinetinin 2022-ci il 13 may tarixli 184 nömrəli Qərarı ilə təsdiq edilmiş “İdxalı və satışı əlavə dəyər vergisindən azad edilən
media məhsullarının və kitabların (elektron kitablar istisna olmaqla), habelə dərslik komplektlərinin və həmin malların (məhsulların) istehsalı (nəşri) ilə bağlı rulon və ya vərəqə şəklində kağızın Siyahısı” ilə müəyyən edilmiş məhsulların idxalı və satışı;
– dəfn və qəbiristanlığın mərasim xidmətləri;
– “Startap” şəhadətnaməsi almış təsərrüfat subyektlərinin həmin startap üzrə fəaliyyəti;
– dövlət büdcəsinin vəsaiti hesabına müdafiə və ya dövlətin təhlükəsizlik ehtiyacları üçün satın alınan məhsullar.
Bu sənəddə nəzərdə tutulan hallarda Məcəllənin 6-cı fəslinin tələbləri aşağıdakı fəaliyyət sahələrinə və məhsullara tətbiq edilmir:
– aqrar sahədə mikro və kiçik sahibkarlıq fəaliyyəti ilə məşğul olan hüquqi şəxslərin istehsal və digər təsərrüfat fəaliyyəti (məhsulların emalı, saxlanması, daşınması və satılması);
– idman klublarının fəaliyyəti;
– mədəniyyət xidmətləri (muzeylərin, tarix və mədəniyyət əhəmiyyətli parkların və qoruqların fəaliyyəti).
