2024-cü ilin 1 yanvar tarixinə olan məlumata əsasən, Azərbaycanda Çin istehsalı olan minik avtomobillərinin sayı 18 314 ədədə çatıb ki, bu da ötən ilin eyni dövrü ilə müqayisədə 25% artım deməkdir.
Banker.az xəbər verir ki, lider mövqedə 4 864 avtomobil ilə Changan qərarlaşıb (artım: 55.7%). Onu Chery (2 853 ədəd, +11%) və Haval (2 097 ədəd, +33%) izləyir. Ən sürətli böyüməni isə 87.3% artımla JAC markası nümayiş etdirib.
Çindən Azərbaycana idxal edilən minik avtomobillərinin strukturu da dəyişib. 2024-cü ildə ölkəyə 19 404 ədəd Çin istehsalı avtomobil gətirilib, ümumi dəyəri isə 456,3 milyon dollar olub. Ən böyük payı “plug-in” ( xarici mənbədən doldurma qabiliyyətinə malik olanlar istisna) hibrid benzin avtomobilləri (8 432 ədəd, 198,6 milyon dollar) təşkil edir.
Bunun ardınca “plug-in” olmayan hibrid modellər (4 720 ədəd, 115,5 milyon dollar) və elektrik avtomobilləri (2 314 ədəd, 82,3 milyon dollar) gəlir.
Ənənəvi benzin mühərrikli avtomobillərin idxalı da davam edib. Dövlət Statistika Komitəsinə istinadən məlumata görə, 1000-1500 kub sm mühərrikli modellərdən 2 546 ədəd gətirilib.
Beləliklə, Azərbaycanda Çin markalarının ümumi avtomobil parkındakı payı son bir ildə 1 faizdən 1.1 faizə qalxıb.
