“Barclays” bankı Brent markalı neftin qiyməti ilə bağlı proqnozunu artırıb. İndi bankın analitikləri 2025-ci ildə bir barelin 72 dollara başa gələcəyini gözləyirlər ki, bu da onların əvvəlki təxminindən 6 dollar çoxdur. 2026-cı il üçün proqnoz da 10 dollar artırılaraq bir barel üçün 70 dollara çatdırılıb. Bu, qlobal neft tələbi ilə bağlı gözləntilərin yaxşılaşması ilə əlaqədar olub.
“Barclays” izah edir ki, geosiyasi gərginlik azalsa da (xüsusən də risk mükafatlarını aradan qaldıran İran-İsrail atəşkəsi qüvvəyə mindikdən sonra), cari neft qiymətləri bazarın yaxşılaşan fundamental göstəricilərini əks etdirir.
OPEC+ ölkələrinin (o cümlədən Rusiya) hasilatı daha sürətlə artırmasına baxmayaraq, ikinci rübdə qlobal neft ehtiyatları yenə azalıb.
Gözlənilən qiymət artımı üç əsas amillə bağlıdır: neftə tələbatın gözləniləndən daha güclü artımı; qeyri-OPEC ölkələrindən tədarük artımının zəifləməsi; Beynəlxalq Enerji Agentliyinin (IEA) ilkin tələb hesablamalarının yuxarıya doğru yenidən nəzərdən keçirilməsi.
ABŞ-yə gəlincə, bank bu il orada neft tələbinin əvvəlki təxminindən 100 000 barel çox olmaqla 130 000 barel artacağını gözləyir. Hava şəraitinin dəyişməsi ilə əlaqədar proqnozu yenidən nəzərdən keçirməsinə baxmayaraq, “Barclays” hələ də tələb artımının sonradan tədricən yavaşlamasını gözləyir.
“Barclays” qeyd edir ki, OPEC+ könüllü hasilatın azaldılmasından daha tez əl çəkərsə, real hasilat artımı plandan geri qalacaq. Bank misal olaraq 2025-ci ilin martından may ayına qədər olan dövrü göstərir: OPEC+ alyansının hasilat hədəfi sutkada 548 min barel artırılıb, lakin qrupun faktiki hasilatı sabit qalıb və nəticədə razılaşdırılmış kvotalara daha yaxşı riayət olunmasına gətirib çıxarıb.
