Texnologiya səhmləri “Nvidia”nın nəticələrindən sonra geri çəkildi. Banker.az xəbər verir ki, şirkət analitik gözləntilərini üstələsə və III rüb üçün proqnozu Uol-Strit dəyərləndirməsindən yüksək olsa da, məlumat mərkəzi gəlirlərindəki zəiflik və Çinlə bağlı qeyri-müəyyənlik səbəbindən səhmlər qeyri-rəsmi ticarətdə 3%-dən çox ucuzlaşdı.
Hesabata əsasən bir səhmə düşən mənfəətlilik (EPS) 1.04 dollar olmaqla bazar tərəfindən proqnozlaşdırılan 1.01 dollar üstələyib. Gəlirlər ilk yarımildə 46.1 mlrd. dollar proqnoza qarşı 46.7 mlrd. dollar olub.
Nəticələrdən sonra ABŞ indeksləri də geri çəkildi: S&P 500 e-mini fyuçersləri 0,1%, Nasdaq fyuçersləri isə 0,2% azaldı. MSCI Asiya-Sakit okean indeksi isə 0,3% gerilədi.
Asiya texnologiya sektorunda eniş müşahidə olundu – “Taiwan Semiconductor Manufacturing Co” 1,7%, “Samsung Electronics” isə 0,7% ucuzlaşdı. Bu, Avropa sessiyasında ASML üçün də mənfi siqnal ola bilər. Əksinə, “Nvidia”nın Çinli rəqibləri yüksəldi: SMIC 8,3%, “Cambricon Technologies” isə 7,1% bahalaşdı. Bu artımlar STAR 50 indeksini 5%-ə qədər qaldırdı.
Digər bazarlarda isə Fransa istiqrazlarının gəlirliliyi sabitləşdi, 30 illik faizlər 2011-ci ildən bəri ən yüksək səviyyədən geri çəkildi. Yaponiyada Nikkei 225 indeksi 0,6% artdı. Kyodo agentliyi xəbər verdi ki, baş danışıqlarçı Ryoşey Akazava ABŞ-a planlaşdırılan səfərini ləğv edib.
