Təhlükəsizlik sistemləri istehsalçısı “Verisure” Stokholmda keçirilən IPO zamanı təxminən €3,2 milyard (təxminən $3,72 milyard) vəsait cəlb edib, bu barədə şirkətin açıqlamasına istinadən “Bloomberg” yazır. Cəlb olunan vəsaitin həcminə görə bu IPO Avropada son üç ilin, İsveçdə isə 2000-ci ildən bəri ən irisi olub.
“Verisure” səhmlərin qiymətini €13,25 səviyyəsində müəyyən edib. Bu, şirkətin elan etdiyi qiymət diapazonunun yuxarı həddinə yaxındır. IPO nəticəsində şirkətin bazar dəyəri təxminən €13,7 milyard olub. Stokholm Fond Birjasında debüt ticarət zamanı “Verisure” səhmləri €16,53-ə qədər yüksəlib ki, bu da IPO qiymətindən 24,8% çoxdur.
“Verisure”nin IPO-su 2022-ci ildə Almaniyada “Porsche”nin birja debütündən bəri ən böyük yerləşdirmə olub — o zaman avtomobil istehsalçısı €9,1 milyard cəlb etmişdi. “Bloomberg” qeyd edir ki, “Verisure”nin uğurlu yerləşdirməsi 2025-ci ildə İsveçin Avropada birja üzrə əsas maliyyə mərkəzlərindən biri kimi mövqeyini möhkəmləndirib. İnvestisiya platforması “Levler”in rəhbəri Yoakim Bornold hesab edir ki, “Verisure”nin uğuru digər şirkətləri də açıq bazara çıxmağa təşviq edə bilər.
1988-ci ildə təsis edilən “Verisure” Avropa və Latın Amerikasında ev təsərrüfatları və kiçik biznes üçün uzaqdan idarə olunan təhlükəsizlik sistemlərinin hazırlanması ilə məşğuldur. Onun məhsulları arasında video detektorlar, müşahidə kameraları, zərbə sensorları, “ağıllı” qıfıllar və s. yer alır.
“Verisure”nin 2024-cü ildəki gəliri illik müqayisədə 10,3% artaraq €3,41 milyarda, düzəliş olunmuş əməliyyat mənfəəti (EBIT) isə 18% artaraq €819 milyona çatıb. Şirkət IPO vasitəsilə əldə olunan vəsaiti borcların ödənilməsinə və “ADT Mexico” şirkətinin alınması əməliyyatının maliyyələşdirilməsinə yönəltməyi planlaşdırır.
