Beynəlxalq Valyuta Fondu (BVF) 2025-ci ilin yekunlarına əsasən, qlobal iqtisadi artım proqnozunu 3,2%-ə (+0,2%) qədər yaxşılaşdırıb. 2026-cı il üçün proqnoz iyul qiymətləndirməsi ilə eynidir və 3,1% təşkil edir.
“İnkişaf etmiş ölkələrdə artım təxminən 1,5%, inkişaf etməkdə olan ölkələrdə isə 4%-dən çox olacaq”, — BVF-in hesabatında deyilir. Fond həmçinin qlobal inflyasiyanın daha da azalacağını gözləyir.
BVF-in baş iqtisadçısı Pyer-Olivye Qurinşa brifinqdə bildirib ki, ABŞ və Çin arasında ticarət müharibəsinin kəskinləşməsi qlobal iqtisadi artım perspektivlərinə mənfi təsir göstərə bilər. Onun sözlərinə görə, hər iki ölkənin rəsmilərinin son bəyanatları “ticarət qeyri-müəyyənliyinin hələ də davam etdiyini anlamağa vadar edir”.
Proqnoza əsasən, 2025-ci ilin yekunlarına görə Rusiyanın iqtisadi artımı 0,6% olacaq. ABŞ-də bu göstərici 2%, Avropa İttifaqında — 1,2%, Çində — 4,8%, Hindistanda isə 6,6% səviyyəsində proqnozlaşdırılır.
