ABŞ prezidenti Donald Tramp bəyan edib ki, ABŞ hazırda Çinlə ticarət müharibəsi vəziyyətindədir. O, bunu Ağ Evdə jurnalistlərə deyib.
“Biz indi ticarət müharibəsi aparırıq”, – deyə Tramp bildirib. – “Bizdə 100%-lik gömrük rüsumları var. Əgər bizdə bu rüsumlar olmasaydı, tamamilə aciz görünərdik. Bizim heç bir qorunma vasitəmiz olmazdı”.
Tramp əlavə edib ki, gömrük rüsumları ABŞ-nin müdafiəsi və milli təhlükəsizliyi üçün çox vacib bir alətdir.
“Əgər bizdə rüsumlar olmasa, milli təhlükəsizliyimiz də olmaz. Rüsumlar bizim yeni milli təhlükəsizliyimiz üçün o qədər vacibdir ki, əgər onlar olmasaydı, ölkəmiz böyük itkilərlə üzləşərdi, çünki bu alətdən bizə qarşı çox fəal şəkildə istifadə edilib”, – deyə o vurğulayıb.
2025-ci ilin aprelində Vaşinqton və Pekin arasında ticarət qarşıdurması kəskinləşib. Tramp təxminən 200 ölkədən idxal olunan mallara rüsum tətbiq etdiyini, o cümlədən Çin mallarına əlavə 34%-lik tarif qoyulduğunu elan edib. Cavab tədbirləri nəticəsində ABŞ-nin rüsumları 145%-ə çatıb, Çin isə Amerika mallarına tətbiq olunan tarifləri 125%-ə yüksəldib. Tərəflər danışıqlar üçün “ticarət atəşkəsi” elan etsələr də, oktyabrın 11-də Tramp Çin mallarına 100%-lik yeni rüsumlar tətbiq edəcəyini vəd edib.
Oktyabrın 14-də Tramp gömrük rüsumlarının tətbiqindən sonra ABŞ-ni dünyanın ən varlı ölkəsi adlandırıb. ABŞ Konqresinin Büdcə İdarəsinin məlumatına görə, 2025-ci maliyyə ilində (2024-cü il oktyabrın 1-dən 2025-ci il sentyabrın 30-dək) gömrük rüsumlarından əldə olunan gəlir 195 milyard dollar təşkil edib ki, bu da 2024-cü ilə nisbətən 118 milyard dollar çoxdur.
