Şanxay və Şençjen fond birjalarının əsas indeksləri ABŞ prezidenti Donald Trampın 2026-cı ilin əvvəlində Çinə planlaşdırılan səfəri barədə bəyanatından sonra müvafiq olaraq 1,36% və 2,06% artıb. Ticarət məlumatlarına görə, “Shanghai Composite” indeksi 3 916,33 bəndə, “Shenzhen Component” indeksi isə 13 077,32 bəndə yüksəlib.
Şanxay və Şençjen birjalarında qeydiyyatdan keçmiş ən iri 300 şirkətin səhmlərinin dinamikasını əks etdirən “CSI 300” indeksi 1,53% artaraq 4 607,87 bəndə çatıb.
ABŞ prezidenti Donald Tramp 20 oktyabr tarixində bildirib ki, onun Çinə səfəri gələn ilin əvvəlinə planlaşdırılıb. O həmçinin qeyd edib ki, 31 oktyabr – 1 noyabr tarixlərində Koreya Respublikasında keçiriləcək APEC sammiti çərçivəsində Çin sədri Si Cinpin ilə ədalətli ticarət razılaşması şərtləri üzərində işləməyi planlaşdırır.
9 oktyabrda Çin Xalq Respublikasının Ticarət Nazirliyi nadir torpaq metalları və onlarla bağlı texnologiyaların ixracına nəzarət tədbirlərinin sərtləşdirilməsinə dair iki sənəd dərc edib. 10 oktyabrda isə Tramp bəyan edib ki, ABŞ 1 noyabrdan etibarən və ya daha tez Çindən idxal olunan məhsullara əlavə 100 faizlik gömrük rüsumu tətbiq edəcək, həmçinin proqram təminatına dair ixrac nəzarəti tədbirlərini gücləndirəcək.
