ABŞ prezidenti Donald Tramp və Yaponiyanın Baş naziri Sanae Takaiti tənəzzülə davamlı sənayelər üçün vacib hesab edilən kritik minerallar və nadir torpaq elementlərinin tədarükünə dair saziş imzalayıblar. Bu barədə “Reuters” məlumat verib.
Tramp və Takaiti arasında danışıqlar 28 oktyabr tarixində Tokioda keçirilib. Bu, yapon Baş nazirinin 21 oktyabrda vəzifəyə başlamasından sonra Ağ Ev rəhbəri ilə ilk görüşü olub. Tramp üçün isə bu, prezidentliyinin ikinci dövründə Yaponiyaya ilk səfəridir. Ümumilikdə, ABŞ lideri ölkəni dörd dəfə ziyarət edib, sonuncu dəfə 2019-cu ildə.
27 oktyabrda bildirilmişdi ki, Tramp yapon imperatoru Naruhito ilə görüşüb. ABŞ prezidenti 2019-cu ildə taxta çıxandan bəri monarx tərəfindən qəbul edilən ilk xarici lider olub.
“Reuters” qeyd edir ki, Trampın səfəri təkcə simvolik deyil, həm də iqtisadi əhəmiyyət daşıyır. Bundan əvvəl ABŞ prezidenti Tokiodan 550 milyard dollarlıq investisiya öhdəlikləri alıb, bunun müqabilində Vaşinqton idxal tariflərinin yumşaldılmasına razılıq verib. ABŞ ticarət naziri Hovard Latnik və onun yapon həmkarı Resey Akadzava Tokiodakı işçi nahar zamanı enerji infrastrukturu sahəsində mümkün investisiyaları müzakirə ediblər.
25 oktyabrda Tramp Asiya turu çərçivəsində KXDR lideri Kim Çen İn təşəbbüs göstərdiyi təqdirdə, onunla görüşməyə hazır olduğunu da bəyan etmişdi.
