Rusiya prezidenti Vladimir Putin dekabrda Hindistana səfər edəcək, bu barədə onun mətbuat katibi Dmitri Peskov məlumat verib. Səfərin dəqiq tarixi açıqlanmır.
“Zamanı gələndə məlumat verəcəyik,” – deyə Peskov qeyd edib.
“Roskongress”in saytında yer alan məlumata görə, 4–5 dekabr tarixlərində Nyu-Dehlidə ikitərəfli forum keçiriləcək və “tədbir 5 dekabrda planlaşdırılan dövlət səfəri ilə eyni vaxta təsadüf edəcək”. Forumun əsas mövzusu Rusiya prezidentinin iştirakı ilə keçiriləcək plenar iclas olacaq. Proqrama həmçinin birgə istehsal, turizm sahəsində əməkdaşlıq və turist axınının artırılması mövzularında müzakirələr də daxil edilib.
Rusiya xarici işlər naziri Sergey Lavrov daha əvvəl Vladimir Putinin dekabrda Nyu-Dehlini ziyarət etməyi planlaşdırdığını bildirmişdi. O vurğulayıb ki, iki ölkə arasında münasibətlər xüsusi imtiyazlı strateji tərəfdaşlıq prinsipləri əsasında qurulub.
