“Xiaomi” səhmləri bir neçə ay ərzində bazarın “sevimlilərindən” Çin texnologiya şirkətlərinin ən zəif nəticə göstərən kağızlarına çevrilib, bu barədə bazar məlumatlarına istinadən “Bloomberg” yazıb. Agentliyin məlumatına görə, şirkətin səhmlərinin sürətli bərpasına smartfon və elektromobil bazarındakı problemlər mane olur.
İyuna qədər “Xiaomi” səhmləri sürətli yüksəliş yaşayıb və bu, şirkətin kapitallaşmasını 200 milyard dollara qədər artırıb. Lakin artım uzun çəkməyib: iki aydan az müddətdə, sentyabr zirvələrinə nisbətdə, səhmlər 30%-dən çox ucuzlaşıb və Honq-Konq birjasının texnoloji sektor indeksinə — “Hang Seng Tech”ə daxil olan şirkətlər arasında ən zəif dinamika göstərib. 18 noyabr ticarət sessiyasının yekununda “Xiaomi” səhmləri 2,8% azalaraq 40,78 Honq-Konq dollarına (5,2 ABŞ dolları) düşüb.
Çin bazarında istehlakçı aktivliyinin zəif olması və “Apple”ın iPhone 17 modelinin güclü satışları səbəbindən “Xiaomi” üçün qiymətləri artırmaq çətindir. “InSpectrum Tech”in məlumatına görə, smartfonlar üçün DRAM yaddaş çiplərinin kontrakt qiymətləri oktyabr ayında 21% artaraq 2022-ci ilin iyulundan bəri maksimum səviyyəyə çatıb.
Bununla yanaşı, “Xiaomi” sifarişləri yerinə yetirmək üçün elektromobil istehsalını artırmağa çalışır. İstehsal gücü ilə bağlı problemlər nəzərə alınaraq, fond meneceri “Aberdeen Investments”dən Sin-Yao Nq qeyd edir ki, avtomobil tədarükü və nəticədə gəlir gözlənildiyi qədər yüksək olmaya bilər. “Bloomberg” əlavə edir ki, Çin iqtisadiyyatının vəziyyəti ilə bağlı narahatlıqlar və istehlak sektorundakı sərt qiymət müharibələri də investor marağına mənfi təsir göstərib.
Digər tərəfdən, “Xiaomi” səhmlərinin ucuzlaşması onları daha əlçatan edir, “Bloomberg” vurğulayır. Agentliyin hesablamalarına görə, səhmlər hazırda P/E (price-to-earnings; qiymətin mənfəətə nisbəti) əmsalı 19 səviyyəsində ticarət olunur ki, bu da 2025-ci ildəki pik göstəricidən iki dəfə aşağıdır. 47 analitik hələ də “Xiaomi” səhmlərini almağı tövsiyə edir, cəmi ikisi satmağı, üçü isə saxlamağı məsləhət görür.
