İndoneziya qızıl ixracına rüsumların tətbiqindən sonra əlavə olaraq təxminən 6 trilyon İndoneziya rupisi (təqribən 360 milyon dollar) əldə etməyi gözləyir. Bu barədə “Antara” agentliyi ölkənin maliyyə naziri Purbaya Yudhı Sadevanın sözlərinə istinadən məlumat verib.
“Biz satış qiyməti yüksək olduqda ixrac rüsumu tətbiq edə bilərik. <…> Qızıl üçün bu rüsum mütləq tətbiq olunmalıdır, çünki onun qiyməti çox yüksəkdir”, – deyə İndoneziyanın energetika və mineral resurslar naziri Baxlil Lahadaliya bildirib. Nəşrdə qeyd olunur ki, qiymətli metallara ixrac rüsumlarının tətbiqi ilə bağlı qərar maliyyə nazirliyi tərəfindən hazırlanır.
Maliyyə Nazirliyinin nümayəndəsi Febrio Kakaribu bildirib ki, qızıl üzrə rüsum dərəcələri dünya bazar qiymətlərindən asılı olaraq 7,5%-dən 15%-ə qədər dəyişəcək. Bu qərar həm də ölkə daxilində xammalın emalını stimullaşdırmağa yönəlib. Kakaribu dəqiqləşdirib ki, rüsumlar müxtəlif növ qızıllara — qızıl-gümüş dorə ərintisi, qranullar, tökmə və ölçülü qızıl külçələrə şamil ediləcək. Hökumət nümayəndələri qeyd edirlər ki, 2025-ci ilin dördüncü rübündə dünya bazarında qızılın qiyməti bir troy unsiyası üçün 4 min dollara çatıb.
“Antara” həmçinin bildirir ki, İndoneziya büdcəsinin artırılması kömür və digər minerallara ixrac rüsumlarının tətbiqi hesabına da nəzərdə tutulur.
