Hindistan və ABŞ ticarət sazişi üzrə məsələlərin böyük hissəsini həll edib və müqavilə ilin sonunadək imzalana bilər. Bunu Hindistanın ticarət və sənaye nazirinin müavini, ABŞ ilə danışıqlar üzrə baş nümayəndə Raceş Aqarval ölkənin ən böyük biznes assosiasiyası — Hindistan Ticarət və Sənaye Palataları Federasiyasının (FICCI) illik toplantısında bildirib.
Onun sözlərinə görə, ikitərəfli ticarət sazişi üzrə danışıqlar başlayandan bəri dünya ticarətində çox dəyişikliklər baş verib. “Hindistan–ABŞ ticarət sazişi ilə bağlı qalan istənilən məsələlər siyasi səviyyədə həll oluna bilər”, — deyə o əlavə edib. Aqarval bildirib ki, Hindistan mövcud təqvim ilində razılaşma əldə etməyi ümid edir, çünki müzakirə olunmalı çox az məqam qalıb.
Nazir müavininin vurğuladığına görə, Hindistan ABŞ ilə iki paralel saziş üzrə danışıqlar aparır: biri ticarət sazişi, digəri isə ABŞ prezidenti Donald Tramp tərəfindən tətbiq edilmiş rüsumlarla bağlıdır. “ABŞ ilə qarşılıqlı ticarət sazişinin imzalanması bir qədər vaxt aparacaq, çünki dəyişmiş rüsum dinamikası ən əlverişli rejim çərçivəsindəki tarifləri üstələyir”, — deyə o bildirib.
“Hindistan yüksək ABŞ rüsumları ləğv edildikdən sonra ticarət sazişinin ölkənin ixracı üçün sərfəli olacağını düşünür”, — Aqarval əlavə edib.
