Türkiyə 1993-cü ildən bağlı olan Ermənistanla quru sərhədinin yaxın altı ay ərzində açılması imkanını nəzərdən keçirir. Bu barədə mənbələrə istinadən “Bloomberg” yazıb.
“Belə addım soyuq müharibə dövründən Avropada qalan son bağlı sərhədi aradan qaldırmağa və Qafqazda ticarətin bərpasına yol açmağa imkan verəcək”, – açıqlamada deyilir.
Xatırladaq ki, Türkiyə Ermənistanla sərhədi 1993-cü ildə Qarabağ münaqişəsi zamanı Azərbaycanla həmrəyliyini nümayiş etdirmək üçün bağlamışdı.
22 noyabrda Ermənistanın Baş naziri Nikol Paşinyan bildirib ki, ölkə 2026-cı il parlament seçkilərindən sonra yeni konstitusiya üzrə referendum keçirəcək. Azərbaycan hakimiyyəti dəfələrlə Ermənistanın konstitusiyanın preambulasından Dağlıq Qarabağa dair istinadları çıxarmasını sülh sazişinin imzalanması üçün ilkin şərt kimi irəli sürüb.
8 avqustda Bakı və İrəvan Vaşinqtonda ABŞ prezidenti Donald Trampın iştirakı ilə sülh münasibətləri haqqında birgə bəyannamə imzalayıblar. Bəyannamə gələcəkdə Ermənistan və Azərbaycanın xarici işlər nazirləri tərəfindən paraflanmış sülh sazişinin imzalanmasını və ratifikasiyasını nəzərdə tutur.
11 avqustda Azərbaycan və Ermənistan XİN-ləri ölkələr arasında ilkin sülh sazişinin mətnini dərc ediblər. Sənəd 17 bənddən ibarətdir. Tərəflər qarşılıqlı ərazi iddialarından imtina edir və bir-birinin daxili işlərinə qarışmaqdan və güc tətbiqindən çəkinəcəklər.
