Çinin ən iri dağ-mədən konsernlərindən biri olan “CMOC Group” Braziliyadakı qızıl aktivlərini “Equinox Gold Corp.” şirkətindən 1 milyard dollara almaq barədə razılığa gəlib. Saziş nəticəsində CMOC Braziliyada bir neçə mədən və yataqlara sahib olan “Equinox”un iki strukturu — “Leagold LatAm Holdings BV” və “Luna Gold Corp.” üzərində nəzarəti əldə edəcək. Müqavilənin şərtlərinə əsasən, “Equinox” 900 milyon dolları nağd, həmçinin sövdələşmənin bağlanmasından bir il sonra 115 milyon dollar alacaq. Bu barədə CMOC birja üçün yaydığı açıqlamada bildirib.
Agentlik xatırladır ki, CMOC dünyanın ən sürətlə böyüyən dağ-mədən konsernlərindən biridir. 2023-cü ildə şirkət “Glencore Plc”ni geridə qoyaraq dünyanın ən böyük kobalt istehsalçısı olub, eyni zamanda iri mis aktivlərinə də sahibdir. Sənaye metalları üzrə qiymətlərin artması fonunda konsern yüksək gəlirlilik nümayiş etdirir və bu ilin əvvəlində M&A (birləşmə və satınalmalar) sahəsində, xüsusilə mis, qızıl və nadir torpaq metalları seqmentlərində sövdələşmələrə fokuslanmaq niyyətində olduğunu açıqlayıb.
CMOC-un direktorlar şurasının sədri Lyu Tsyanfın ayrıca bəyanatında bildirib ki, “Equinox”la bağlanan sövdələşmə konsernin qızıla olan inamını nümayiş etdirir. Onun sözlərinə görə, bu alış şirkətin aktivlərinə strateji əlavə olacaq və Cənubi Amerikadakı mövqeyini gücləndirəcək. “Bloomberg” əlavə edib ki, sövdələşmə ilə bağlı xəbərlər fonunda CMOC-un səhmləri Honq-Konqda bu gün 3,4% bahalaşıb, 2025-ci ilin iyun ayının sonundan etibarən isə onların dəyəri iki dəfə artıb.
“Bloomberg” qeyd edir ki, bu il qızılın qiyməti kəskin yüksəlib — metalın dəyəri qoruyucu aktivlərə artan tələbat səbəbindən bir neçə dəfə rekord həddə çatıb. Mis qiymətləri isə yüksək tələbat və hasilatda yaranan fasilələr fonunda 30%-dən çox artaraq rekord səviyyələrə yüksəlib.
Media xatırladır ki, bu ilin əvvəlində CMOC Kanadanın “Lumina Gold Corp.” şirkətini 581 milyon Kanada dollarına (422 milyon dollar) alaraq Ekvadordakı ən iri ilkin qızıl yatağına çıxış əldə edib. Bu sövdələşmə Çin konserninə Aurizona, RDM, Fazenda və Santa Luz mədənləri üzərində tam nəzarət imkanı verəcək. Bu mədənlərin ümumi illik qızıl hasilatı təxminən 8 ton təşkil edir. Şirkətin məlumatına görə, Ekvadordakı mədənlərdən birinin istismara verilməsindən sonra istehsal həcmi 20 tondan çox arta bilər. Sövdələşmənin 2026-cı ilin birinci rübündə bağlanması gözlənilir.
“Forbes”in məlumatına görə, noyabr ayında “Garda Capital” investisiya strateqi Aleksandr Baxtin qızılın kəskin bahalaşmasını şərq ölkələrinin mərkəzi bankları tərəfindən metalın aktiv şəkildə alınması ilə izah edib. Onun sözlərinə görə, bu addım Rusiyanın aktivlərinin dondurulması presedentindən sonra mümkün sanksiyalardan qorunmaq məqsədi daşıyır. “Goldman Sachs” isə bildirib ki, bu ilin sentyabr ayında mərkəzi bankların qızıl alışları avqustla müqayisədə üç dəfə artaraq 64 tona çatıb. Analitiklər hesab edirlər ki, 2026-cı ilin sonuna qədər qızılın qiyməti unsiya üçün 4900 dollara yüksələ bilər.
