Videooyun istehsalçısı “Electronic Arts”ın (EA) səhmdarları “Battlefield”, “The Sims”, “Medal of Honor”, “Command & Conquer”, “Dead Space”, “Mass Effect” və “Dragon Age” kimi məşhur franşizaları ilə tanınan şirkətin 55 milyard dollara satılmasını təsdiqləyiblər. Sövdələşməyə Səudiyyə Ərəbistanının Dövlət İnvestisiya Fondu (“Public Investment Fund”, PIF) rəhbərlik edir. Bu barədə “Bloomberg” yazır.
Qeyd olunur ki, investorlar şirkətin hər səhm üçün 210 dollar qiymətlə satın alınmasını təsdiqləyiblər. Səsvermə 22 dekabr tarixində baş tutub.
Agentlik bildirir ki, Səudiyyə Ərəbistanının PIF fondu fəaliyyətini neftdən kənar sahələrə şaxələndirmək məqsədilə interaktiv media sektoruna iri həcmdə vəsait yatırır. EA-nın özəlləşdirilməsi tərtibatçılara dövlət investorlarının rüblük göstəricilərə nail olmaq üçün göstərdiyi təzyiq olmadan, keyfiyyətli oyunların yaradılmasına fokuslanmaq imkanı verəcək.
Oktyabrın sonunda “Electronic Arts” məlumat vermişdi ki, 2025-ci ilin iyul–sentyabr aylarında şirkətin xalis mənfəəti 2024-cü ilin eyni dövrü ilə müqayisədə 2,15 dəfə azalaraq 137 milyon dollar təşkil edib (səhm başına 0,54 dollar). Şirkətin gəliri illik müqayisədə 9,2% azalaraq 1,84 milyard dollara düşüb. Hesabat maliyyə rübündə qəbul edilən sifarişlərin həcmi isə 13% azalaraq 1,82 milyard dollar olub.
