Avropanın ən iri müdafiə şirkətləri 2025-ci ildə səhmdarlara təxminən 5 milyard dollar dividend ödəyəcək. Bu, Ukraynada müharibədən sonra qlobal hərbi xərclərin artması fonunda investisiyaların paralel şəkildə artırılması ilə müşayiət olunur. Bu barədə “Financial Times” son on il üzrə məlumatların təhlilinə istinadən yazır. Təhlil “Vertical Research Partners” tərəfindən hazırlanıb.
Mülki biznesinin həcminin böyük olması səbəbilə “Airbus”u istisna edən araşdırma göstərir ki, səhmdarlara ödənişlər son 10 ilin maksimum səviyyəsinə çatıb. Bununla yanaşı, Rusiyanın Ukraynaya qarşı genişmiqyaslı hücumunun başlanmasından təxminən dörd il sonra sektor üzrə investisiyalar nəzərəçarpacaq dərəcədə artıb: şirkətlər istehsal güclərini genişləndirirlər. Gözlənilir ki, 2025-ci ildə investisiyaların orta səviyyəsi (kapital xərcləri və elmi-tədqiqat və təcrübə-konstruktor işlərinə çəkilən xərclərin gəlirlərə nisbəti) 2021-ci ildəki 6,4%-dən 7,9%-ə yüksələcək.
ABŞ-də isə dinamika fərqlidir: altı ən iri müdafiə şirkətinin səhmdarlar üçün gəlirliliyi 2023-cü ildəki pikdən sonra azalıb, investisiyaların satışlara nisbəti isə bir qədər aşağı düşüb. Bu fonda xüsusilə ABŞ-də sənaye tənqid olunur ki, bumdan əldə olunan gəlirlər istehsalın artırılmasına deyil, səhmlərin geri alınmasına yönəldilir.
