İranda etiraz aksiyaları zamanı saxlanılan şübhəlilər barəsində sürətli məhkəmə prosesləri keçirilməli və edam hökmləri icra olunmalıdır. Bu barədə ölkənin məhkəmə hakimiyyətinin rəhbəri Qolam Hüseyn Möhseni-Edjei “Associated Press”ə açıqlamasında bildirib.
“Əgər biz sabitliyi bərpa etmək istəyiriksə, bunu indi etməliyik. Tez etməliyik. Əgər bu prosesi iki və ya üç ay uzatsaq, təsiri tamam fərqli olacaq”, — deyə o bildirib.
İran dövlət televiziyası tərəfindən yayımlanan bu bəyanat ABŞ prezidenti Donald Trampın etirazçıların öldürülməsinə görə ölkəyə hərbi zərbə endirilə biləcəyi ilə bağlı hədələrinə baxmayaraq səsləndirilib. “Reuters”in daha əvvəl verdiyi məlumata görə, etirazların dağıdılması zamanı, təhlükəsizlik qüvvələrinin əməkdaşları da daxil olmaqla, təxminən 2,6 min nəfər həlak olub.
Tehranda etiraz aksiyaları ötən ilin 28 dekabrında başlayıb və qısa müddətdə digər iri şəhərlərə yayılıb. Aksiyalara səbəb milli valyutanın kəskin dəyər itirməsi olub. İran hakimiyyətləri ABŞ və İsraili aksiyaların təşkilində, qızışdırılmasında, eləcə də şəhər küçələrinə terrorçuların çıxarılmasında ittiham ediblər. Çərşənbə günü Tehran preventiv zərbə hazırladığını açıqlayıb, bundan sonra Pentaqon Qətərdə yerləşən əsas Yaxın Şərq hərbi bazasındakı şəxsi heyətə axşama qədər təxliyə olunmağı tövsiyə edib.
