Hindistanın “Reliance Industries” şirkəti bir aylıq fasilədən sonra fevral və mart aylarında sanksiya tələblərinə uyğun olan Rusiya neftinin alışını bərpa edəcək. Bu barədə “Reuters” yazıb.
Digər hindistanlı neft emalı zavodları (NEZ) kimi, “Reliance” də Rusiya xammalını sanksiyalara məruz qalmayan satıcılardan alacaq. Mənbələr fevral və mart ayları üçün tədarük həcmlərini açıqlamayıblar.
Alışların daha sonrakı dövrdə davam edib-etməyəcəyi hələlik məlum deyil. “Reuters”in sorğusuna şirkət cavab verməyib. Mənbələrin qiymətləndirməsinə görə, Hindistanın Rusiya nefti idxalının ümumi həcmi yaxın aylarda məhdud səviyyədə qalacaq.
“Biz sanksiyaların gözlənilmədən tətbiq olunduğu və həcmləri azaltmalı olduğumuz vəziyyətlərlə üzləşmişik”, — deyə “Reliance”in emal və marketinq üzrə baş əməliyyat direktoru Şrinivas T. bildirib. O əlavə edib ki, şirkət əvvəlcədən digər ölkələrin neft şirkətlərindən alışları artırıb.
“Reliance” ABŞ-nin “Rosneft” və LUKOIL şirkətlərinə qarşı bloklayıcı sanksiyalar tətbiq etməsindən sonra noyabr ayında Rusiya neftinin alışını dayandırmışdı. Dekabrın sonunda isə “Bloomberg” şirkətin alışları yenidən bərpa etdiyini yazmışdı.
