Neft qiymətləri cümə axşamı Beynəlxalq Enerji Agentliyi (IEA) tərəfindən 2026-cı il üzrə qlobal tələbin aşağı salınmasından sonra azalıb.
Banker.az xəbər verir ki, Brent markalı neft 2.9% enərək 67.37 dollara, WTI isə 3% düşərək 62.67 dollara geriləyib. Eniş bu gün də davam edib.
IEA illik qlobal neft tələbi artımı proqnozunu günlük 850 min barel səviyyəsinə endirib. Qurum bunu yüksək qiymətlər və iqtisadi qeyri-müəyyənliklə əlaqələndirib. Çin artımın əsas mənbəyi olaraq qalacaq, lakin əvvəlki illərlə müqayisədə daha zəif templə. Hesabatda 2026-cı ildə qlobal təklif artıqlığının formalaşacağı da vurğulanıb. Bu tendensiya OPEC və müttəfiqlərinin 2025-ci ilin aprelindən hasilatı artırmağa başlaması ilə güclənib.
ABŞ–İran gərginliyi bazarda risk mükafatını yüksəldib. ABŞ Prezidenti Donald Trump Yaxın Şərqdə vəziyyət fonunda Venesuela ilə münasibətlərin “möhtəşəm” olduğunu bildirib və neft axınının artdığını qeyd edib.
ABŞ-da yanvar üzrə güclü məşğulluq göstəriciləri tələblə bağlı gözləntiləri dəstəkləsə də, faiz endirimi ehtimallarını azaldıb. Eyni zamanda, xam neft ehtiyatlarının 8.5 mln. barel artması qiymətlərə əlavə təzyiq göstərib.
