ABŞ Venesueladan 50 milyon barel neft alıb və bu neft Texas ştatının Hyuston şəhərinə çatdırılacaq. Bu barədə ABŞ prezidenti Donald Tramp Corciya ştatında poladəritmə müəssisəsində tərəfdarları qarşısında çıxışı zamanı bildirib.
“Venesuela ilə çox yaxşı münasibətlərimiz var. Biz onlara neftlə bağlı kömək edirik, onların çoxlu nefti var. Bizim də var, amma onlara çox kömək edirik. Biz 50 milyon barel neft almışıq, onu hazırda nəhəng gəmilər Hyustona daşıyır”, — deyə Tramp bildirib.
Yanvarın 3-də Vaşinqtonda Karakasda hərbi əməliyyatın keçirildiyi və nəticədə ABŞ hərbçiləri tərəfindən Venesuela prezidenti Nikolas Maduro və onun həyat yoldaşının saxlanıldığı açıqlanmışdı. Yanvarın 5-də onlar Nyu-York ştatının Cənub dairəsinin federal məhkəməsi qarşısına çıxarılıblar. Onlara narkotik ticarəti ilə əlaqədə ittiham irəli sürülüb. Maduro və həyat yoldaşı günahlarını etiraf etməyiblər. Venesuelada dövlət başçısının səlahiyyətlərini Maduronun dövründə icraçı vitse-prezident vəzifəsini tutmuş Delsi Rodriges yerinə yetirir. ABŞ administrasiyası Venesuelanın müvəqqəti idarəçiliyini ABŞ-nin öz üzərinə götürəcəyini bildirmişdi.
Yanvarın 6-da Tramp respublika hakimiyyətinin satış üçün ABŞ-yə 30 milyondan 50 milyon barelə qədər neft verməyə razılaşdığını və bu əməliyyatdan əldə olunacaq gəlirlərə nəzarəti şəxsən həyata keçirəcəyini söyləmişdi. Administrasiya rəhbəri vurğulamışdı ki, Venesuela bu neft satışından əldə etdiyi vəsait hesabına yalnız ABŞ məhsullarını alacaq.
