Çərşənbə günü, fevralın 25-də Asiya valyutaları möhkəmlənərək son 16 ayın maksimumuna çatıb. Buna dolların zəifləməsi və yuanın sabit şəkildə güclənməsi təkan verib.
“Bloomberg” tərəfindən hesablanan Asiya valyutalarının dollara qarşı indeksi 2024-cü ilin oktyabrından bəri ən yüksək səviyyəyə yüksəlib. İnkişaf etməkdə olan Asiya ölkələrinin valyutaları dolların dəyərdən düşməsindən faydalanır. Bu isə ABŞ-nin gələcəkdə idxal tarifləri və fiskal siyasəti ilə bağlı qeyri-müəyyənlikdən qaynaqlanır. Sözügedən amillər ABŞ dövlət borcunun həcmi ilə bağlı narahatlıqları artıraraq dollara tələbi azaldır.
Asiya valyutaları “ABŞ dollarının zəifləməsi, risk iştahasının artması və bayramlardan sonra yuanın davamlı möhkəmlənməsi daxil olmaqla bir sıra amillər” sayəsində daha yaxşı nəticələr göstərib. Bunu Sinqapurda yerləşən “Oversea-Chinese Banking Corp.”un valyuta strategisti Kristofer Vonq bildirib. Onun sözlərinə görə, “ABŞ-dən kənarda sabit artım dinamikası qorunduğu müddətdə Asiya valyutaları üçün potensial mövcuddur”.
Çin yuanı son həftələrdə möhkəmlənib, çünki mərkəzi bank sabit ixrac fonunda milli valyutanın güclənməsinə daha çox dözümlülük nümayiş etdirir. Bu, Cənubi Koreya, Tayvan, Malayziya və Tailand valyutalarının mövqeyini yaxşılaşdırıb, çünki onların Çinlə sıx ticarət əlaqələri var.
Bu arada qlobal investorlar Asiya şirkətlərinə yönəlib, TSMC və “Samsung Electronics Co.”nun səhmlərinə tələbat artıb. Hər iki şirkət süni intellekt üzrə qlobal rəqabətdə regionun əsas təchizatçıları və innovatorları hesab olunur.
