Rusiya Avropa ölkələri ilə neft və qaz tədarükü məsələsində işləməyə hazırdır, lakin bunun üçün Avropa tərəfinin siqnal verməsi lazımdır.
Bunu Rusiya Prezidenti Vladimir Putin Kremldə qlobal neft və qaz bazarındakı vəziyyətə həsr olunmuş müşavirədə bildirib.
O qeyd edib ki, son bir həftə ərzində neftin qiyməti 30% artıb.
Putinin sözlərinə görə, Rusiya dəfələrlə xəbərdarlıq edib ki, Yaxın Şərqdə vəziyyəti qeyri-sabitləşdirmək cəhdləri qlobal yanacaq və enerji sektorunu təhlükə altına qoyur.
“Rusiya etibarlı tərəfdaş olan ölkələrə neft və qaz tədarükünü davam etdirəcək. Biz başa düşürük ki, hazırkı yüksək enerji qiymətləri müvəqqətidir. Əgər Rusiya artan neft və qaz tədarükü tələb edən yeni bazarlara diqqət yetirsə, həmin bazarlarda möhkəmlənə bilər”, – deyə Rusiya prezidenti bildirib.
Putin əlavə edib ki, Hörmüz boğazından asılı olan neft tədarükləri yaxın bir ay ərzində tamamilə dayana bilər.
Onun sözlərinə görə, hazırda qlobal qaz qiymətləri neft qiymətlərindən daha sürətlə artır.
“Enerji tədarükünün pozulması bütün beynəlxalq iqtisadi münasibətlər sisteminə təsir göstərir. Rusiya enerji şirkətləri həmişə sabitliyi ilə tanınıb. Neft və qaz qiymətlərinin hazırkı artımı müvəqqəti xarakter daşıyır və Rusiya bunu anlayır”, – deyə Putin qeyd edib.
