Venesuelanın müvəqqəti prezidenti Delsi Rodriges öz müavini Paula Enaonu neft sənayesi nazirliyinin rəhbəri vəzifəsinə təyin edib. Bu vəzifə son iki ay ərzində vakant idi. Daha əvvəl həmin postu vitse-prezident vəzifəsi ilə yanaşı məhz xanım Rodriges özü tuturdu.
Milli televiziya ilə yayımlanan bəyanatında Delsi Rodriges bildirib ki, Paula Enao yüksək peşəkarlığa və geniş təcrübəyə malikdir. Bu isə nazirliyə “ölkə iqtisadiyyatının artımı və Venesuela xalqının rifahı üçün əsas dayaqlardan biri olan enerji sektorunun bərpası və inkişafında” irəliləyiş əldə etməyə imkan verəcək.
Yanvarın sonunda Venesuela parlamenti ölkənin milli neft sənayesini köklü şəkildə islahat edən və xarici, ilk növbədə ABŞ neft şirkətlərinə ölkədə fəaliyyət göstərməyə imkan verən qanunu qəbul edib. Qanun 2007-ci ildə neft layihələrinin milliləşdirilməsi çərçivəsində qəbul edilmiş bir çox qərarı ləğv edir. Həmin qərarlar nəticəsində ExxonMobil və ConocoPhillips kimi iri Amerika şirkətləri ölkəni tərk etmişdi.
